தடுப்பூசி இல்லாமல் கொரோனாவை குணமாக்கும் மருந்து – உற்சாகத்தில் ஆய்வாளர்கள்

கடந்த டிசம்பர் மாதம் சீனாவில் பரவத் துவங்கிய கோரோனா தொற்று 200க்கும் மேற்பட்ட நாடுகளில் மாபெரும் பாதிப்பை ஏற்படுத்தி வருகிறது.

இதுவரையில் உலகம் முழுவதும் 48 லட்சத்திற்கும் அதிகமானோர் பாதிக்கப்பட்டுள்ளனர். 3 லட்சத்து 20 ஆயிரத்திற்கும் மேற்பட்டோர் பலியாகிய நிலையில், சுமார் 19 லட்சம் பேர் குணமடைந்துள்ளனர்.

அமெரிக்கா, இத்தாலி, ரஷ்யா, பிரான்ஸ் உள்ளிட்ட நாடுகள் அதிகபட்ச பாதிப்படைந்துள்ளது.

தற்போதைய நிலவரப்படி கொரோனா வைரசுக்குத் தடுப்பு மருந்து கண்டுபிடிக்கப்பட்டால் மட்டுமே இதிலிருந்து முழுமையாக மீள முடியும் என்ற நிலையுள்ளதால் உலகின் அனைத்து முன்னணி நாடுகளும் கொரோனா தடுப்பு மருந்துகளைக் கண்டுபிடிக்கும் முயற்சியில் ஈடுபட்டு வருகின்றன. தற்காலிகமாக தீவிரமாக கொரோனா தொற்றுள்ளவர்களுக்கு ரெம்டெசிவைர் எனும் மருந்தை மருத்துவர்கள் அளித்து வருகின்றனர்.

இந்நிலையில் தடுப்பூசியே இல்லாமல் கொரோனாவை கட்டுப்படுத்தும் மருந்தை தயாரித்து வருவதாக சீனாவின் புகழ் பெற்ற பீகிங் பல்கலைக் கழக ஆய்வாளர்கள் தெரிவித்துள்ளார்.

இது குறித்து பீகிங் பல்கலைக் கழகத்தின் அதிநவீன கண்டுபிடிப்பு மையத்தின் இயக்குநர் சன்னி ஷீ “வைரஸ் தொற்று பாதித்த எலிக்கு நாங்கள் அதை செயலிழக்கச் செய்யும் ஆன்ட்டிபாடிக்களை கொடுத்தோம் 5 நாட்களுக்குப் பிறகு நோய்த்தொற்று பெரிய அளவில் குறைந்திருந்ததைக் கண்டோம், எனவே இந்த மருந்துக்கு சிகிச்சை சக்தி இருக்கிறது என்றே பொருள்.

மனித உடல் நோய் எதிர்ப்புச் சக்தி உருவாக்கும் ஆன்ட்டிபாடிக்களை கொரோனாவிலிருந்து மீண்ட 60 பேரிடமிருந்து எடுத்தோம் இதை வைத்து தான் எலிப்பரிசோதனை செய்தோம். இதில் பெரிய அளவில் கொரோனாவுக்கான சிகிச்சை இருப்பதாக உணர்கிறோம்

இத்தகைய ஆண்ட்டிபாடிக்காக இராப்பகலாக உழைத்து வருகிறோம். எங்களுடையது ஒற்றை செல் மரபணுவியலாகும், நோய் எதிர்ப்பாற்றலியலோ வைரலியலோ அல்ல. ஒற்றை செல் மரபணு அணுகுமுறை, நோய்த் தொற்றை செயலிழக்கச் செய்யும் ஆன்ட்டிபாடிகளை கண்டுபிடிக்க முடியும் என்பதைக் கண்டு நாங்கள் உண்மையில் உற்சாகமடைந்தோம். இந்த ஆண்டின் இறுதியில் இந்த மருந்து தயாராகி விடும்.” என கூறியுள்ளார்.

சீனா ஏற்கெனவே 5 தடுப்பூசிகளைக் கொண்டு மனித பரிசோதனையை துவக்கியுள்ளது குறிப்பிடத்தக்கது.