தமிழக முன்னாள் அமைச்சர் எஸ்.பி.வேலுமணியின் மகன் விஜய் விகாஸின் திருமண வரவேற்பு விழா கோவை கொடிசியா அரங்கில் பிரமாண்டமாக நடைபெற்றது. இவ்விழாவில், அ.தி.மு.க. பொது செயலர் எடப்பாடி கே. பழனிசாமி கலந்து கொண்டு மணமக்களை வாழ்த்தினார்.
வழக்கமாக, முக்கிய அரசியல் தலைவர்கள், இல்லத் திருமண விழாக்களில் சிறிது நேரம் உரையாற்றி, மணமக்களை வாழ்த்துவதே மரபாக இருந்தாலும், பழனிசாமி உரை நிகழ்த்தாமல் இருந்தார். அவர் குடும்பத்தினருடன் மற்றும் எம்.எல்.ஏ.,க்கள், முன்னாள் அமைச்சர்களுடன் புகைப்படம் எடுத்துக் கொண்டு, அங்கிருந்து வெளியேறினார்.
இந்த விழாவிற்கு முன்னாள் அமைச்சர் செங்கோட்டையன் மதியமே வந்துவிட்டார். அவர், பழனிசாமியின் வருகையை தவிர்க்கும் வகையில், முன்கூட்டியே மணமக்களை வாழ்த்திச் சென்றார். இதேபோல், முன்னாள் அமைச்சர் மா.பா.பாண்டியராஜன், பழனிசாமி வருவதற்கு முன்பே திருமண விழாவில் கலந்து கொண்டு, மணமக்களை வாழ்த்திச் சென்றார்.
முன்னாள் அமைச்சர்கள் தங்கமணி, செல்லூர் ராஜு, எம்.ஆர். விஜயபாஸ்கர் ஆகியோர் பழனிசாமி திருமண விழாவை விட்டு புறப்பட்ட பின்னரே நிகழ்வில் கலந்து கொண்டனர். அத்துடன், பா.ஜ.க, தே.மு.தி.க., நாம் தமிழர் கட்சி உள்ளிட்ட பல்வேறு எதிர்க்கட்சித் தலைவர்களும் வரவேற்பு நிகழ்ச்சியில் பங்கேற்றனர். இவ்விழாவில், மணமக்கள் குடும்பத்தினரால், அனைவரும் அன்புடன் வரவேற்கப்பட்டனர்.
விழாவின் பாதுகாப்பு ஏற்பாடுகளாக, உளவுத்துறை அதிகாரிகள், முக்கிய வி.ஐ.பி.க்களின் வருகையை கண்காணித்து, குறிப்பிட்ட இடங்களில் பாதுகாப்பு பணியில் ஈடுபட்டனர். ஒவ்வொரு நுழைவாயிலும் உளவுத்துறை அதிகாரிகள் பணியமர்த்தப்பட்டு, விழாவின் ஒழுங்குமுறையை பராமரிக்கக் கவனம் செலுத்தினர்.