பிரதமர் மோடியை கொலை செய்வதாக மிரட்டல் விடுத்து பெண் ஒருவர் பரபரப்பை கிளப்பியுள்ளார்.
பிரதமருக்கே கொலை மிரட்டல் விடுத்த 34 வயது பெண் மும்பை போலீசாரால் தற்போது கைது செய்யப்பட்டுள்ளார்.
மும்பை காவல் கட்டுப்பாட்டு அறைக்கு செல்போனில் கால் ஒன்று வந்துள்ளது. அதில் பெண் ஒருவர் பேசியுள்ளார். அந்தப் பெண் காவல் நிலைய அதிகாரிகளிடம் பிரதமரை கொலை செய்வதற்கான முழுமையான திட்டமும், அதற்கென பிரத்தியேக ஆயுதமும் தன்னிடம் தயாராக இருப்பதாக கூறி பிரதமர் மோடியை கொலை செய்யப் போவதாக மிரட்டல் விடுத்துள்ளார்.
இதையடுத்து மும்பை போலீசார் அந்தப் பெண்ணின் நம்பரை ஆய்வு செய்து தற்போது அதிரடியாக கைது செய்துள்ளனர். அதுமட்டுமில்லாமல் இந்த சம்பவம் குறித்து அம்போலி காவல் நிலையத்தில் எஃப்ஐஆர் ஒன்றும் பதிவு செய்யப்பட்டுள்ளது.
அடுத்து மும்பை போலீசார் மேற்கொண்ட தீவிர விசாரணையில் நாட்டின் பிரதமரான மோடிக்கு கொலை மிரட்டல் விடுத்த பெண்ணுக்கு எந்தவித குற்றப்பின்னணியோ, அவர் மீது எந்த வழக்குகளோ இல்லை என தெரியவந்துள்ளது.
ஆனாலும் அந்தப் பெண்ணிடம் போலீசார் முழுமையான விசாரணையை தொடங்க உள்ளதாக தெரிவித்துள்ளனர். கொலை மிரட்டல் விடுத்தால் சந்தேக நபரை கண்காணிக்கும் போது அனைத்து நெறிமுறைகளும் முறையாக பின்பற்றப்படும் என போலீசார் தெரிவித்துள்ளனர்.
மேலும் முதல்கட்ட விசாரணையில் அந்தப் பெண் மனநலம் பாதிக்கப்பட்டு இருக்கலாம். ஏனெனில் எந்தவித குற்ற பின்னணியும் இல்லாத ஒரு பெண் பிரதமருக்கே கொலை மிரட்டல் விடுகிறார் என்றால் அவர் சாதாரணமான மனநிலையில் இல்லை என்பது தெரிகிறது. இவ்வாறு போலீசார் தரப்பு தகவல்கள் தெரிவிக்கின்றன.