AMMK DMK TVK: அம்மா மக்கள் முன்னேற்ற கழகத்தின் பொதுச்செயலாளரான டிடிவி தினகரன், அண்மையில் முதல்வர் வேட்பாளராக எடப்பாடி பழனிசாமியை ஏற்க முடியாது என்று கூறி NDA கூட்டணியிலிருந்து வெளியேறினார். மேலும் தற்போதைய பாஜக மாநில தலைவர் நயினார் நாகேந்திரனனின் செயல்பாடுகள் பிடிக்கவில்லை என்றும் கூறி வந்தார். இதனை தொடர்ந்து இவரை மீண்டும் கூட்டணியில் சேர்க்க பாஜக எவ்வளவு முயற்சித்தும் அது ஈடேறவில்லை. இபிஎஸ்யை கடுமையாக எதிர்த்து வரும் டிடிவி தினகரன் அடுத்து என்ன செய்ய போகிறார் என்ற கேள்வி அனைவரது மனதிலும் எழ, அவர் விஜய் அல்லது திமுக உடன் கூட்டணி அமைப்பார் என்று எதிர்பார்க்கப்பட்டது.
இதனை உறுதிப்படுத்தும் விதத்திலேயே அவரது நடவடிக்கைகளும் இருந்தது. மேலும் தவெகவுக்கும், எம்ஜிஆர், ஜெயலலிதா கடுமையாக எதிர்த்த திமுகவுக்கும் தான் போட்டி என்று அவர் கூறியதால் தவெக பக்கம் சாய்வதற்கான வாய்ப்புகள் அதிகளவில் இருந்தது. ஆனால் தற்போது அவர் கூறிய கருத்து விஜய்யை எதிர்த்தும் திமுகவிற்கு ஆதரவாகவும் இருக்கிறது. நேற்று முன்தினம் புதுவையில், பொதுக்கூட்டம் நடத்திய விஜய், புதுச்சேரி தமிழகத்தை விட சிறப்பாக செயல்பட்டு வருகிறது என்று பாராட்டி இருந்தார். இது பலரின் கண்டனங்களுக்கும் ஆளான நிலையில், இது குறித்து டிடிவி தினகரன் பேசியுள்ளார்.
பாண்டிச்சேரி தமிழ்நாட்டை விட சிறப்பாக உள்ளது என்பது விஜய்யின் கருத்து, என்னுடைய கருத்து அது கிடையாது என்று விஜய் கருத்துக்கு மறுப்பு தெரிவித்துள்ளார். இது தமிழகத்தில் திமுக ஆட்சி சிறப்பாக நடைபெற்று வருகிறது என்பதை அவர் உணர்த்தியுள்ளதாக பார்க்கப்படுகிறது. செங்கோட்டையன் தவெகவில் சேர்ந்ததால் தினகரனும் கூடிய விரைவில் விஜய் கட்சியில் இணைவார் என்று கூறப்பட்ட நிலையில், இவரின் இந்த பேச்சு அதற்கு முற்றுப்புள்ளி வைத்துள்ளது. இதன் காரணமாக இவர் திமுகவில் சேர்வதற்கான சாத்திய கூறுகள் அதிகளவில் உள்ளது.