தமிழ் சினிமாவில் முக்கிய இயக்குனராக இருப்பவர் லோகேஷ் கனகராஜ். குறிப்பாக இளைஞர்களுக்கு மிகவும் பிடித்த இயக்குனர் இவர். அதற்கு காரணம் இவர் கதை சொல்லும் விதமும் இவர் படங்களில் இடம் பெறும் ஆக்‌ஷன் காட்சிகள்தான். லோகேஷ் இயக்கிய முதல் படம் மாநகரம். இந்த படமே பலருக்கும் பிடித்திருந்தது.

அதன்பின் கார்த்தியை வைத்து கைதி படத்தை இயக்கினார். ஒரே இரவில் நடக்கும் இந்த கதைக்கு மிகவும் சிறப்பாக திரைக்கதை அமைத்திருந்தார் லோகேஷ். இந்த படம் ஹிட் அடிக்கவே விஜயை வைத்து மாஸ்டர் படத்தை இயக்கினார். இந்த படம் மூலம் விஜய் ரசிகர்களுக்கு மிகவும் பிடித்த இயக்குனராக மாறினார்.

அடுத்து கமலை வைத்து லோகேஷ் இயக்கிய விக்ரம் திரைப்படம் சுப்பர் ஹிட் அடித்தது. இந்த படத்திற்கு லோகேஷ் அமைத்திருந்த திரைக்கதை பலராலும் பாராட்டப்பட்டது. இந்த படத்திற்கு பின் மீண்டும் விஜயை வைத்து லியோ படத்தை இயக்கினார். இந்த படம் கலவையான விமர்சனத்தை பெற்றது.

விக்ரம் படத்தில் ரோலக்ஸ் என்கிற கேமியோ வேடத்தில் சூர்யா அசத்தலாக நடித்திருந்தார். இந்த வேடம் சூர்யாவுக்கும் பெயர் வாங்கி கொடுத்தது. எனவே, ரோலக்ஸ் வேடத்தை தனியாக வைத்து ஒரு படத்தை லோகேஷ் இயக்க வேண்டும் என சூர்யா ரசிகர்கள் அப்போதிலிருந்தே கேட்டு வருகிறார்கள்.

இந்நிலையில், ரெட்ரோ படம் ரிலீஸை தொடர்ந்து இது தொடர்பான ஒரு விழாவில் கலந்து கொண்ட லோகேஷ் ‘அடுத்து கைதி 2 படம் இருக்கிறது. ரோலக்ஸ் படம் கண்டிப்பாக செய்வேன். செய்துதான் ஆக வேண்டும். கூலி படத்தின் வேலைகளும் வேகமாக நடந்து வருகிறது’ என தெரிவித்திருக்கிறார்.