குமரி மாவட்டம் திருவிதாங்கூர் சமஸ்தானத்தின் கீழிருந்த சமயத்தில் பத்மநாபபுரத்தில் நவராத்திரி விழா மிகவும் விமர்சையாக நடைபெறுவது வழக்கம். அதன் பிறகு குமரி மாவட்டம் தாய் தமிழகத்துடன் ஒன்றிணைந்ததும், நவராத்திரி விழா கேரளா மாநிலம் திருவனந்தபுரத்திற்கு மாற்றம் செய்யப்பட்டது.

இந்த விழாவில் குமரி மாவட்டம் குமாரகோவில் முருகன் தேவாரக் கட்டு, சரஸ்வதி அம்மன், சுசீந்திரம் முன்னுதித்த நங்கை அம்மன், ஆகிய 3 சிலைகளும் பங்கேற்று வருகின்றன. வருடம் தோறும் இந்த 3 சாமி சிலைகளும் மிகவும் விமர்சையாக ஊர்வலத்துடன் திருவனந்தபுரம் சென்று வருகிறன. நோய் தொற்று பிரச்சனையிருந்த போதும் கூட பத்மநாபபுரத்திலிருந்து திருவனந்தபுரத்திற்கு சாமி ஊர்வலம் நடைபெற்றதாக தெரிகிறது.

சுசீந்திரம் முன்னுதித்த நங்கை அம்மன் புறப்படும்போது அம்மனுக்கு காவல்துறையினர் துப்பாக்கி ஏந்தி அணிவகுப்பு மரியாதை செலுத்துவார்கள். அதோடு காவல்துறையினரின் பேண்டு வாத்தியமும் இடம்பெறும். இவ்வளவு சிறப்புமிக்க முன்னுதித்த நங்கை அம்மன் கோவில் சுசீந்திரம் தாணுமாலய சுவாமி கோவில் தெப்பக்குளக்கரையில் இருக்கிறது.

இந்த திருக்கோவில் குறித்த கதை சுசீந்திரம் தல புராணத்திலிருக்கிறது. லட்சுமி, சரஸ்வதி, பார்வதி, உள்ளிட்ட 3 பேரும் குழந்தை வடிவிலிருந்த தங்களுடைய கணவர்கள் மறுபடியும் வடிவம் பெற கார்த்தியாயினி நோன்பு இருந்த போது காட்சி கொடுத்த தாய் தெய்வம், இவள் கௌதமரின் சாபம் நீங்க இந்திரன் 300 கன்னியரை சாட்சியாக வைத்து பூஜை செய்தபோது தோன்றியவள் எனவும், கதைகள் தெரிவிக்கின்றன.

இந்தக் கோவில் வடக்குப் பார்த்து இருக்கிறது என்றாலும், தெற்கு வாசல் வழியே தான் பக்தர்கள் செல்ல இயலும். இந்த வழியாக சென்று தெற்கு வடக்காக அமைந்திருக்கும். கோவிலின் வடக்கு முன் மண்டபத்தையடையலாம்.

கருவறையில் முன் அர்த்தமண்டபம் இருந்தாலும், முக மண்டபத்திலிருந்து பக்தர்கள் இறைவியை தரிசிக்க இயலும். செவ்வாய்க்கிழமைகளில் அம்மனுக்கு மகிஷாசுரவர்த்தினி அலங்காரம் செய்யப்படுகிறது.

நினைத்த காரியத்தை நிறைவேற்றுபவள் முன்னூதித்த நங்கை என தெரிவிக்கிறார்கள் அந்தப் பகுதி பெண் பக்தர்கள். திருமண தடை மற்றும் குழந்தையில்லா பெண்கள் அம்மனை வேண்டி பலன் பெறுகிறார்கள். அதன் பிறகு நேர்ச்சையாக உருவங்களையும், தொட்டில்களையும், காணிக்கையாக செலுத்துகிறார்கள்.

உள்ளூர் பக்தர்கள் மட்டுமல்லாமல் சுற்றுலா பயணிகளும் கோவிலுக்கு சென்று அம்மனை தரிசனம் செய்து விட்டு வருகிறார்கள். முன்னுதித்த நங்கை யம்மனின் சிறப்புகளை அறிந்து கொண்ட நடிகரும், நாடாளுமன்ற உறுப்பினருமான, சுரேஷ்கோபி அம்மனின் தீவிர பக்தராகிவிட்டார்.

நேரம் கிடைக்கும் போதெல்லாம் கோவிலுக்கு வரும் அவர் அம்மனை தரிசித்து விட்டு செல்கிறார். அதோடு கோவிலில் சில நற்ப்பணிகளையும் அவர் நிறைவேற்றியுள்ளதாக தெரிகிறது.

மற்ற அம்மன் கோவில்களை போல இங்கேயும் ஆடி மாதம் பல்வேறு சிறப்பு வழிபாடுகள் நடைபெறுகின்றன. ஆடி மாதம் ஒவ்வொரு செவ்வாய்க்கிழமைகளிலும், அம்மனுக்கு வித, விதமான அலங்காரங்கள் செய்யப்படுகின்றன.

ஆடிப்பூர தினத்தன்று அம்மனுக்கு குழந்தை வடிவில் அலங்காரம் செய்யப்படுகிறது. ஆடி செவ்வாய்க்கிழமைகளில் பக்தர்களுக்கு அன்னதானமும் வழங்கப்படுகிறது.

தானு மாலையான் கோவிலின் திருவிழாவிற்கும், இந்த கோவிலுக்குமிடையே இருக்கின்ற உறவு காலம் காலமாக தொடர்ந்து வருகிறது.

தானுமாலையன் கோவில் திருவிழா ஆங்காரபலி இங்கே தான் நடைபெறுகிறது தேர் திருவிழாவிற்கு முந்தைய நாள் இரவில் இங்கே பூஜை நடைபெறும்.

பூஜை விவரம்: காலை 5:30 மணிக்கு நடை திறப்பு. 6 மணிக்கு பூஜை, 7:00 மணிக்கு பூஜை, மாலை 5 மணிக்கு நடை திறப்பு, 7 மணிக்கு பூஜை 8 மணிக்கு நடை அடைப்பு.