Indian Railway: மோசமான ரயில் கழிப்பறை விவகாரம் தொடர்பாக பயணிக்கு ரூ.30,000 இழப்பீடு வழங்க வேண்டும் என விசாகப்பட்டினம் மாவட்ட நுகர்வோர் நீதிமன்றம் உத்தரவிடப்பட்டுள்ளது.

ஆந்திர மாநிலம் விசாகப்பட்டினம் மாவட்டத்தைச் சேர்ந்தவர் மூர்த்தி. இவர் கடந்த 2023-ம் ஆண்டு ஜூன் 5-ம் தேதி தனது குடும்பத்தாருடன் திருமலா எக்ஸ்பிரஸ் ரயிலில் திருப்பதியில் இருந்து புறப்பட்டு விசாகப்பட்டினம் வந்து கொண்டிருந்தார். இவர் 3-வது ஏ.சி.வகுப்பில் பயணம் செய்தார். அப்போது அவர் பயணித்த பெட்டியின் கழிப்பறை மோசமான நிலையில் இருந்தது. கழிப்பறையில் தண்ணீரும் வரவில்லை.

மேலும், அவர் பயணித்த ரயில் பெட்டியின் ஏ.சி.யும். சரியாக வேலை செய்யவில்லை. இதுதொடர்பாக அவர் ரயில்வே  அதிகாரிகளிடம் புகார் செய்தார். ஆனால் அவர்கள் சரி செய்ய முயன்றும் சரியாகவில்லை. இதனால் கோபமடைந்த அவர் மீண்டும் துவ்வாடா நகரிலுள்ள ரயில் நிலையத்தில் ரயில் நின்ற போது அங்குள்ள அலுவலகத்திலும் மூர்த்தி புகார் செய்தார். ஆனால் எந்த ஒரு நடவடிக்கையும் எடுக்கவில்லை. இதனால் அவர் விசாகபட்டினம் நுகர்வோர் குறைதீர்  ஆணையத்தில் வழக்கு தொடர்ந்தார்.

இந்த வழக்கை ஏற்ற நுகர்வோர் குறைதீர்  ஆணையம், விசாரித்து ரயில்வே துறைக்கு ரூ.30,000 அபராதம் விதிக்கப்பட்டது. அதில் வழக்கு செலவுக்காக ரூ.5,000 வழங்குமாறும், பயணிக்கு ஏற்பட்ட மன உளைச்சலுக்காக ரூ.25,000 வழங்க வேண்டும் என்று அதிகாரபூர்வமாக உத்தரவு பிறப்பித்துள்ளது. பயணிகள் பாதுகாப்பாகவும், வசதியாகவும் பயணம் செய்வதற்காக ரயில்வே நிர்வாகம் கட்டணம் வசூலிக்கிறது. ஆனால் அது சரியாக கிடைக்கவில்லை என்பதால் தென் மத்திய ரயில்வே இழப்பீடு வழங்க வேண்டும் என தீர்ப்பு கூறியுள்ளது.