2026 சட்டமன்றத் தேர்தல் தமிழ்நாட்டில் அரசியல் களத்தை புதுமையாக உருவாக்கியுள்ளது. இதற்கு முக்கிய காரணமாக நடிகர் விஜய் ஆரம்பித்துள்ள தமிழக வெற்றி கழகமும் அமைந்துள்ளது. இவ்வாறு தமிழக அரசியலில் பல முனை போட்டி நிலவி வரும் சூழலில் அதிமுகவும் பாஜகவும் கூட்டணியாக தேர்தலை சந்திக்கலாமா என்ற வகையில் பேசப்பட்டு வருகின்றன. எடப்பாடி பழனிசாமி டெல்லியில் அமித்ஷாவை திடீரென சந்தித்தது தமிழக அரசியலில் பரபரப்பை ஏற்படுத்தியுள்ளது

அதிமுக-பாஜக கூட்டணி: விரிசலின் தொடக்கம்

பல ஆண்டுகளாக தமிழக அரசியல் traditionally இருதலைப்போட்டியாகவே இருந்து வந்தது. பாஜக தமிழகத்தில் கட்சியை வளர்க்க முயற்சி செய்ததன் காரணமாக அவ்வபோது அக்கட்சியின் தலைமையில் கூட்டணி அமைக்கவும் முயற்சி செய்து வருகிறது. இதன் விளைவாக முதலில், 2021 சட்டமன்றத் தேர்தலில் அதிமுக-பாஜக கூட்டணி போட்டியிட்டிருந்தாலும், தேர்தல் முடிவுகள் எதிர்பார்த்த அளவுக்கு சாதகமாக அமையவில்லை. பின்னர், பாராளுமன்றத் தேர்தலை முன்வைத்து, பாஜக அதன் சொந்த அடிப்படை வாக்கு வங்கியை உருவாக்க முயன்றது. இதனால் அதிமுகவுடனான உறவில் ஒரு பிளவு ஏற்பட்டது. இதற்கு அக்கட்சியின் மாநில தலைவர் அண்ணாமலை அதிமுக தலைவர்கள் மீது வாய்த்த விமர்சனம் முக்கிய காரணமாக கருதப்பட்டது.

மீண்டும் அதிமுக-பாஜக கூட்டணி பேச்சுவார்த்தை

இந்நிலையில் இருகட்சிகளின் நலனை கருத்தில்கொண்டு, 2026 சட்டமன்றத் தேர்தல் முன்னிட்டு பாஜக மீண்டும் அதிமுகவுடன் கூட்டணியை உறுதி செய்ய விரும்புவதாக தகவல்கள் வந்துள்ளன. பாஜக தனது வாக்கு வங்கியை மட்டுமே நம்பி தமிழகத்தில் வெற்றி பெற முடியாது என்பதையும், அதிமுகவின் ஆதரவு இல்லாமல் ஒரு முக்கியமான தாக்கத்தை ஏற்படுத்த முடியாது என்பதையும் உணர்ந்திருக்கிறது. இதனால், பாஜக மாநில அளவில் அதிமுகவுடன் சமரசத்துக்கு தயாராகி இருப்பதாகவும், இது தொடர்பாக உச்ச மட்டத்திலான பேச்சுவார்த்தைகள் நடைபெறுவதாகவும் தகவல்கள் வெளியாகியுள்ளன.

அதிமுக உட்கட்சி விவகாரம்

அதிமுகவில் உள்ள மத்தியில் உள்ள பல்வேறு குழப்பங்களும், முன்னாள் முதல்வர் ஓ.பன்னீர்செல்வத்துடன் ஏற்பட்ட முரண்பாடுகளும், கட்சியின் எதிர்கால கூட்டணித் திட்டங்களை பாதிக்கக்கூடும். இதை சமாளிக்க, எடப்பாடி பழனிசாமி, பாஜகவின் ஆதரவைப் பெற முயற்சி செய்கிறார் என்று அரசியல் வட்டாரங்களில் பேசப்படுகிறது. அதே நேரத்தில் பாஜகவுடனான கூட்டணியால் அதிமுக சிறுபான்மையினர் வாக்குகளை இழந்துள்ளதாக அக்கட்சியின் நிர்வாகிகள் கருதுகின்றனர். இந்நிலையில் மீண்டும் அக்கட்சியுடன் கூட்டணி வைத்தால் அதிமுகவின் எதிர்காலம் கேள்விக்குறியாகும் என்றும் கருதுகின்றனர். இதுமட்டுமல்லாமல் அதிமுகவின் உட்கட்சி விவகாரங்களில் பாஜக ஈடுபடுவது அதிமுகவினர் மத்தியில் கொந்தளிப்பை ஏற்படுத்தியுள்ளது. அதை பிரதிபலிக்கும் வகையில் தான் இவ்வளவு நாட்களாக எடப்பாடி பழனிசாமி பாஜக தரப்புக்கு வளைந்து கொடுக்காமல் சிவப்பு கொடி காட்டி வந்தார்.

எடப்பாடிக்கு பாஜக மீது திடீரென ஏற்பட்ட ஆதரவு மனநிலை

அந்த வகையில் ஒரு கட்டத்தில் பாஜகவின் ஆக்கிரமிப்பு அரசியல் பாணியால் அதிமுக அசௌகரியத்தில் இருந்தது. ஆனால், தற்போதைய நிலைமையில், எதிர்கட்சியான திமுகவுடன் நேரடியாக போராட, பாஜகவுடன் மீண்டும் கூட்டணி அவசியம் என எடப்பாடி கருதும் நிலையில் இருக்கிறார்.அதுமட்டுமல்லாமல் அவருக்கு எதிராக பாஜக தரப்பு இறுதிகட்ட அஸ்திரத்தை எடுத்துள்ளதும் இதற்கு காரணமாக கூறப்படுகிறது. இதுவரை அதிமுகவின் இரண்டாம் கட்ட தலைவர்களை வைத்து காய் நகர்த்தி வந்த பாஜக தற்போது எடப்பாடியின் அடி மடியில் கை வைக்க துணிந்து விட்டதால் வேறு வழியின்றி அவரும் சரணாகதி அடைந்து விட்டார் என்றே கூறப்படுகிறது.

இறுதி அஸ்திரம்: வருமான வரித்துறை ரெய்டு

இதுவரை எடப்பாடி பழனிசாமியின் ஆதரவாளர்கள் மற்றும் கட்சியின் இரண்டாம் கட்ட தலைவர்கள் வீடுகளில் மட்டுமே ரெய்டு நடத்தப்பட்டு வந்தது. ஆனால் தற்போது அது எடப்பாடி பழனிசாமி மகன் மிதுன் பழனிசாமி வரை வந்துள்ளது தான் இந்த திடீர் மாற்றத்திற்கான காரணமாக கூறப்படுகிறது. இதன் அடிப்படையில் தான் திடீரென எடப்பாடி பழனிசாமி டெல்லி சென்று அமித்ஷாவை சந்தித்துள்ளார் என்றும் கூறப்படுகிறது.

டெல்லியில் அமித்ஷா-எடப்பாடி பழனிசாமி சந்திப்பு

இந்த அரசியல் பின்னணியில், தற்போது டெல்லியில் நடைபெற்ற அமித்ஷா மற்றும் எடப்பாடி பழனிசாமி சந்திப்பு முக்கியத்துவம் பெற்றுள்ளது. இதில், தேர்தல் கூட்டணி, பகுதி ஒதுக்கீடு, மற்றும் மாநில அரசியலில் எதிர்கால திட்டங்கள் குறித்து விவாதிக்கப்பட்டதாக கூறப்படுகிறது.