தற்போதைய அரசியல் சூழலில் திமுக தலைமையிலான கூட்டணியில் இருந்து மதிமுக வெளியேறக்கூடிய சூழ்நிலையில் இருப்பது போன்று அரசியல் காட்சிகள் நகர்ந்து வருகின்றன. கூட்டணியில் அங்கீகாரம் மற்றும் பிரதான இடமளிப்பு உள்ளிட்ட விவகாரங்களில் மதிமுக அதிருப்தி அடைந்துள்ளதாகக் கூறப்படுகிறது.

திமுக கூட்டணியில் மதிமுகவுக்கு இடமில்லை?

தற்போதைய விவகாரங்களுக்கேற்ப, மதிமுக இன்று நடைபெற்ற ஆலோசனை கூட்டத்தில் “கூடுதல் தொகுதிகளில் போட்டியிட வேண்டும்” என தீர்மானித்துள்ளதாக தகவல்கள் வெளியாகியுள்ளன. இதன் பின்னணியில், மாநிலங்களவையில் வைகோவுக்கு மறுவாய்ப்பு வழங்காதது என்பது முக்கியக் காரணமாகக் கூறப்படுகிறது.

திமுக, வைகோவுக்கு பதிலாக மக்கள் நீதி மையத் தலைவர் கமல்ஹாசனுக்கு மாநிலங்களவை உறுப்பினர் இடம் ஒதுக்கியது, மதிமுகவின் உட்கட்சியில் சலசலப்பை ஏற்படுத்தியுள்ளது. இதனால் வைகோ தலைமையிலான மதிமுக வருங்காலத்தில் தங்கள் நிலையை தக்கவைத்துக்கொள்ள, கூடுதல் தொகுதிகளை வலியுறுத்தி வருகின்றனர்.

கடந்த தேர்தல் அனுபவமும் தீர்மானத்தில் தாக்கம்

• 2021 சட்டப்பேரவைத் தேர்தலில், மதிமுகவுக்கு திமுக வெறும் 4 தொகுதிகள் மட்டுமே முதலில் ஒதுக்கியது.

• பின்னர் “உதயசூரியன்” சின்னத்தில் போட்டியிட ஒப்புக்கொண்டதற்காலத்தில் 6 இடங்கள் வழங்கப்பட்டது.

• 2016ஆம் ஆண்டு, மக்கள் நலக் கூட்டணியில் மதிமுக 29 தொகுதிகளில் போட்டியிட்டது என்பது நினைவில் கொள்ளத்தக்கது.

மேலும், 2024 மக்களவைத் தேர்தலில் துரை வைகோ தனிச் சின்னத்தில் வெற்றி பெற்றதும், திமுக-மதிமுக உறவில் விரிசல் உண்டாக்கியது.

பாஜக–அதிமுக கூட்டணிக்கு மதிமுக தாவுமா?

திமுகவின் தொடர் புறக்கணிப்பால் விரக்தியில் உள்ள மதிமுகவுக்கு, அதிமுக–பாஜக தரப்பிலிருந்து கூட்டணிக்கு அழைப்பு விடுக்கப்பட்டிருப்பதாகக் கூறப்படுகிறது. இந்த கூட்டணியில் மதிமுகவுக்கு 8 முதல் 10 தொகுதிகள் கிடைக்க வாய்ப்புள்ளது என்றும் அரசியல் வட்டாரங்கள் சுட்டிக்காட்டுகின்றன.

அதிமுக, பாஜக இரண்டும் மதிமுகவை உள்ளிழுக்கும் முயற்சியில் தீவிரமாக செயல்பட்டு வருகின்றன.

வரலாறும் வாய்ப்பும்?

2006ல் நடந்தது போன்ற அரசியல் திருப்பங்கள் மீண்டும் நிகழலாம் என நிபுணர்கள் தெரிவித்துள்ளனர். அந்த ஆண்டில், திமுகவுடன் பேச்சுவார்த்தையில் இருந்த வைகோ, அதே நாளில் ஜெயலலிதாவை சந்தித்து அதிமுக கூட்டணிக்கு சேர்ந்த நிகழ்வு நினைவுக்கு வருகிறது. அப்போதும் திமுக அதிர்ச்சியடைந்தது. இதேபோன்று ஒரு ‘சர்ப்ரைஸ்’ திரும்பவும் நிகழ்ந்தாலும் ஆச்சரியமில்லை என கூறப்படுகின்றது.