ஒரே நாளில் ரிலீஸ் ஆகும் இரண்டு தனுஷ் திரைப்படங்கள்
தனுஷ் நடித்த அசுரன் திரைப்படம் சமீபத்தில் வெளியாகி மிகப்பெரிய வெற்றி பெற்ற நிலையில் தற்போது கார்த்திக் சுப்பராஜ் இயக்கத்தில் உருவாகியுள்ள சுருளி என்ற படத்தில் நடித்து முடித்துள்ளார். இதனை அடுத்து அவர் பரியேறும்பெருமாள் இயக்குநர் மாரி செல்வராஜ் இயக்கவிருக்கும் ‘கர்ணன்’ என்ற படத்தில் நடிக்க உள்ளார். இந்த படத்தின் படப்பிடிப்பு அடுத்த மாதம் தொடங்க உள்ளது
இந்த நிலையில் தனுஷ் நடித்த இரண்டு படங்கள் ஒரே நாளில் வெளியாக உள்ளதாக அறிவிக்கப்பட்டுள்ளது. தனுஷ் நடிப்பில் கௌதம் மேனன் இயக்கிய ’என்னை நோக்கி பாயும் தோட்டா’ என்ற திரைப்படம் நீண்ட கால தாமதத்துக்குப் பின் வரும் 29ஆம் தேதி வெளியாக உள்ளது. இந்த படத்திற்கான பிரமோஷன் பணிகள் விறுவிறுப்பாக நடைபெற்று வருகிறது என்பது குறிப்பிடத்தக்கது
இந்த நிலையில் தனுஷ் நடித்த ஹாலிவுட் திரைப்படமான ’The Extraordinary Journey Of The Fakir’ என்ற திரைப்படமும் அதே நவம்பர் 29ஆம் தேதி சீனாவில் வெளியாக உள்ளது. சீனாவில் 13 ஆயிரம் திரையரங்குகளில் இந்த படத்தை வெளியிட திட்டமிட்டிருப்பதாக இந்த படத்தின் இயக்குநர் தனது சமூக வலைப் பக்கத்தில் உறுதி செய்துள்ளார்
மேலும் சீனாவில் வெளியாகும் தனுஷின் முதல் படம் இதுதான் என்பது குறிப்பிடத்தக்கது. கடந்த சில ஆண்டுகளாக தமிழ் படங்களுக்கு சீனாவில் நல்ல வரவேற்பு கிடைத்து வரும் நிலையில் தனுஷின் இந்த படத்திற்கும் வரவேற்பு கிடைக்குமா என்பதை பொறுத்திருந்து பார்ப்போம்
