ஆதிக் ரவிச்சந்திரன் இயக்கத்தில் அஜித் நடித்துள்ள திரைப்படம் குட் பேட் அக்லி. இப்படத்தை பார்க்க அஜித் ரசிகர்கள் மிகவும் ஆவலுடன் எதிர்பார்த்து காத்திருக்கிறார்கள். ஏனெனில், பில்லா, மங்காத்தாவுக்கு பின் அது போன்ற படங்கள் வரவில்லை. அதிலும், கடைசியாக வந்த விடாமுயற்சி படம் ரசிகர்களை எந்தவகையிலும் திருப்திப்படுத்தவில்லை. அஜித்துக்கான மாஸ் காட்சிகள் அதில் சுத்தமாக இல்லை.

சமீபத்தில் இப்படத்தின் டீசர் வீடியோ வெளியாகி ரசிகர்களிடம் வரவேற்பை பெற்றது. ஏனெனில், பக்கா ஆக்சன் கேங்ஸ்டர் படமாக குட் பேட் அக்லி உருவாகியிருக்கிறது. இந்த படத்திற்கு முன் ஆதிக் ரவிச்சந்திரன் இயக்கிய மார்க் ஆண்டனி படமும் சூப்பர் ஹிட் படமாக அமைந்ததால் குட் பேட் அக்லி மீது எதிர்பார்ப்பு அதிகரித்திருக்கிறது.

இந்நிலையில், இப்போது குட் பேட் அக்லி படத்தின் டிரெய்லர் வீடியோவை படக்குழு வெளியிட்டிருக்கிறது. இதற்கு முன் வந்த டீசரை பார்த்தவர்களுக்கு இது குடும்பத்துடன் போய் பார்க்கும்படியான படமாக இருக்குமா என்கிற சந்தேகம் எழுந்தது. ஏனெனில் முழுக்க முழுக்க அஜித் ரசிகர்களை மனதில் வைத்தே டீசர் வீடியோ உருவாக்கப்பட்டிருந்தது. ஆனால், இப்போது வரும் டிரெய்லரில் குடும்பத்துடன் பார்க்கலாம் என்கிற உணர்வை ஏற்படுத்தும் செண்டிமெண்ட் காட்சிகள் இடம் பெற்றிருப்பதாக சொல்லப்பட்டது.

ஆனால், இந்த டிரெய்லரிலும் ஆக்சன் காட்சிகளே அதிகம் இடம் பெற்றிருக்கிறது. மேலும், தீனா, பில்லா, மங்காத்தா என எல்லா லுக்கிலும் வருகிறார் அஜித்குமார். மொத்தத்தில் டிரெய்லர் செம மாஸாக அமைந்திருக்கிறது.