சினிமா நடிகர், நடிகைகளுக்கு பெரும்பாலும் பத்மஸ்ரீ விருது கொடுப்பார்கள். பல வருடங்கள் சினிமாவில் இருந்து மக்களை மகிழ்விக்கும் சில கலைஞர்களுக்கு மட்டுமே பத்மபூஷன், பாரத ரத்னா போன்ற விருதுகளை கொடுப்பார்கள். நடிகர் அஜித்துக்கு சமீபத்தில் பத்மபூஷன் விருது அறிவிக்கப்பட்டது.

விஜயை போலவே அஜித்துக்கும் நிறைய ரசிகர் கூட்டம் இருக்கிறது. சமீபத்தில் வெளியான குட் பேட் அக்லி படமும் சூப்பர் ஹிட் அடித்து 250 கோடி வரை வசூல் செய்திருக்கிறது. ஒருபக்கம், சினிமா மட்டுமில்லாமல் கார் ரேஸிலும் கலக்கி வருகிறார். துபாய் ரேஸில் 3வது பரிசை பெற்ற அஜித் டீம் ஐரோப்பாவில் 2வது பரிசை பெற்றது. இந்நிலையில்தான், பத்மபூஷன் விருது அஜித்துக்கு அறிவிக்கப்பட்டது. நேற்று இந்த விருதை வாங்கி அஜித் குடும்பத்துடன் டெல்லி சென்றார்.

நேற்று மாலை ஜனாதிபதி கையில் பத்ம பூஷன் விருதை அஜித் வாங்கினார். அவர் விருது வாங்கியபோது அவரின் மனைவி ஷாலினி மற்றும் மகன், மகள் என எல்லோரும் எழுந்து நின்று கை தட்டினார்கள். அஜித் விருது வாங்கிய வீடியோவும், புகைப்படமும் இணையத்தில் இப்போது வைரலாகி வருகிறது. இதையடுத்து குட் பேட் அக்லி பட இயக்குனர் ஆதிக் ரவிச்சந்திரன், எதிர்கட்சி தலைவர் எடப்பாடி பழனிச்சாமி உள்ளிட்ட பலரும் அஜித்துக்கு வாழ்த்து சொல்லி வருகிறார்கள்.

இந்நிலையில், நடிகர் விஜய் இன்ஸ்டாகிராமில் வெளியிட்டுள்ள வாழ்த்து செய்தியில் ‘நமது நண்பர் அஜித்குமர் மதிப்பு மிக்க பத்மபூஷன் விருது வாங்கி நம்மை பெருமைப்படுத்தியிருக்கிறார். என் ரசிகர்கள் சார்பாக அவருக்கு வாழ்த்துக்கள்’ என பதிவிட்டிருக்கிறார்.

அதேபோல், நடிகரும், ஆந்திராவின் துணை முதல்வருமான பவன் கல்யாண் ‘பத்மபூஷன் விருதை பெற்ற நடிகர் அஜித்குமார் அவர்களுக்கு மனமார்ந்த வாழ்த்துக்கள். குடும்பம், காதல் கதை போன்ற பல்வேறு வகையான படங்களில் நடித்து அனைத்து வயதினரையும் மகிழ்வித்துள்ளார். திரையுலகில் தனக்கென ஒரு தனித்துவமான முத்திரையை அவர் பதித்துள்ளார். ஃபார்முலா 2 பந்தய வீரராகவும் சிறந்து விளங்குகிறார். ஒரு நடிகராகவும், கார் பந்தய வீரராகவும் திரு.அஜித்குமார் இன்னும் பல வெற்றிகளை பெற வாழ்த்துகிறேன்’ என அந்த வாழ்த்து செய்தியில் கூறியிருக்கிறார்.