Allu arjun: ஷங்கரிடம் உதவி இயக்குனராக வேலை செய்தவர் அட்லி. நண்பன் படம் உருவாகும்போது விஜயுடன் பழக்கம் ஏற்பட்டது. ராஜா ராணி படம் மூலம் இயக்குனராக அறிமுகமான அட்லி அடுத்து விஜயை வைத்து தெறி படத்த இயக்கினார். அட்லி படமெடுக்கும் ஸ்டைல் விஜய்க்கு பிடித்துப்போனதால் அட்லி இயக்கத்தில் மெர்சல், பிகில் ஆகிய படங்களிலும் நடித்தார்.

ஏற்கனவே ஹிட் அடித்த பழைய தமிழ் படங்களின் கதையை கொஞ்சம் மாற்றி படமாக எடுக்கிறார் என்கிற விமர்சனம் துவக்கம் முதலே அவர் மீது இருக்கிறது. ஆனால், அட்லி இதற்கெல்லாம் பதில் சொல்வது இல்லை. படத்திற்கு படம் அவரின் சம்பளம் ஏறிக்கொண்டே போகிறது.

பிகில் படத்திற்கு பின் ஷாருக்கான் அழைத்தார். எனவே, பாலிவுட்டுக்கு போய் ஜவான் என்கிற திரைப்படத்தை இயக்கினார். இந்த படத்தில் விஜய் சேதுபதி, நயன்தாரா, பிரியாமணி உள்ளிட்ட பலரும் நடித்திருந்தார்கள். இந்த படம் 1300 கோடி வரை வசூல் செய்து சாதனை படைத்தது. எனவே, பாலிவுட்டிலும் அட்லிக்கு மவுசு கூடியது. எனவே, சல்மான்கானை வைத்து ஒரு படம் பேசப்பட்டது. ஆனால், சில காரணங்களால் அது நடக்கவில்லை.

எனவே, அல்லு அர்ஜுன் பக்கம் போனார் அட்லி. இந்த படத்தை சன் பிக்சர்ஸ் நிறுவனம் தயாரிப்பதாக சொல்லப்பட்டது. ஆனால், அட்லி மற்றும் அல்லு அர்ஜூன் ஆகியோர் கேட்ட சம்பளத்தில் ஆடிப்போன சன்பிக்சர்ஸ் பின் வாங்கியது. அதன்பின் வேறு சில தயாரிப்பாளர்களை தேடினார்கள். ஆனால், ஒன்றும் நடக்கவில்லை. இப்போது மீண்டும் சன்பிக்சர்ஸ் நிறுவனமே இப்படத்தை தயாரிப்பது உறுதியாகியிருக்கிறது. ஏனெனில், அட்லி மற்றும் அல்லு அர்ஜூனுக்கு சம்பளம் மற்றும் லாபத்தில் பங்கு என பேசப்பட்டு ஒப்பந்தம் கையெழுத்தாகியிருக்கிறது. இந்த படத்தின் அதிகாரப்பூர்வ அறிவிப்பு வருகிற 8ம் தேதி வெளியாகிறது. ஏனெனில் அன்று அல்லு அர்ஜூன் பிறந்தநாள் என்பது குறிப்பிடத்தக்கது.