விக்கிரவாண்டி, விழுப்புரம் மாவட்டத்தில் உள்ள தனியார் பள்ளியில், 4 வயது சிறுமி லியா லட்சுமி கழிவு நீர் தொட்டியில் தவறி விழுந்து பரிதாபமாக உயிரிழந்த சம்பவம் மக்களிடையே பெரும் அதிர்ச்சியையும் சோகத்தையும் ஏற்படுத்தியுள்ளது. இந்தச் சம்பவம் பள்ளி நிர்வாகத்தின் பாதுகாப்பு அலட்சியத்தின் விளைவாக நடந்ததாக கூறப்படுகிறது.
தகர ஷீட் சிதிலமடைந்து அதன் வழியாக சிறுமி கழிவு நீர் தொட்டியில் தவறி விழுந்து மூச்சுத்திணறி உயிரிழந்தார். இந்த சம்பவம் பெற்றோரிடையே கடும் கோபத்தைத் தூண்டி, மக்கள் கண்டனங்களையும் ஏற்படுத்தியது. பெற்றோர் மற்றும் உறவினர்கள், பள்ளி நிர்வாகத்திற்கு எதிராக மறியலில் ஈடுபட்டனர்.
சம்பவ இடத்துக்கு விரைந்து வந்த விக்கிரவாண்டி எம்எல்ஏ அன்னியூர் சிவா மற்றும் காவல்துறையினர், பெற்றோர்களை சமாதானப்படுத்தி மறியலை முடிவுக்கு கொண்டுவந்தனர். இதனிடையே, பள்ளி தாளாளர் எமில்டா, முதல்வர் டொமில்லா மேரோ மற்றும் ஆசிரியர் ஏஞ்சல் ஆகியோருக்கு எதிராக வழக்கு பதிவு செய்யப்பட்டது மற்றும் அவர்கள் கைது செய்யப்பட்டது.
பள்ளி கல்வித் துறையினர் சம்பவத்தின் காரணங்களை ஆராய்ந்து உரிய நடவடிக்கை எடுக்க உத்தரவு பிறப்பித்துள்ளனர். மேலும், சமூக ஊடகங்களில் வெளியான சிசிடிவி காட்சிகள், பள்ளி நிர்வாகத்தின் பாதுகாப்பு குறைகளை வெளிப்படுத்தி மக்களின் கவனத்தை ஈர்த்துள்ளன.
முதலமைச்சர் மு.க. ஸ்டாலின் தனது ஆழ்ந்த இரங்கலையும், பாதிக்கப்பட்ட குடும்பத்திற்கு ரூ.3 லட்சம் நிதி உதவியையும் அறிவித்துள்ளார். இச்சம்பவம், பள்ளிகளின் கட்டமைப்பு மற்றும் பாதுகாப்பு நடைமுறைகள் கடைபிடிக்கப்படும் அவசியத்தை வலியுறுத்துகிறது.
தனியார் பள்ளிகள் அடிப்படை பாதுகாப்பு அளிக்கத் தவறியபோது, அவர்கள் அரசுப் பள்ளிகளுக்கு உதவிக்கரம் நீட்டுவதாகக் கூறுவது ஆச்சரியமாக உள்ளது. கல்வி துறை மற்றும் அரசு நிர்வாகம், மாணவர்களின் பாதுகாப்பை உறுதி செய்ய தேவையான கடுமையான சட்டங்களை அமல்படுத்தி, இத்தகைய சம்பவங்கள் மீண்டும் நிகழாத வகையில் நடவடிக்கை எடுக்க வேண்டும்.