கிறிஸ்துமஸ் பண்டிகைக்காக ரூ.70 கோடி போனஸ் தந்த நிறுவனம்: ஊழியர்கள் மகிழ்ச்சி!
அமெரிக்காவில் உள்ள ரியல் எஸ்டேட் நிறுவனம் ஒன்று தங்கள் நிறுவனத்தில் பணிபுரியும் 200 ஊழியர்களுக்கு ரூபாய் 70 கோடி போனஸ் தொகை அளித்துள்ளது பெரும் ஆச்சரியத்தை அளித்துள்ளது.
அமெரிக்காவின் மேரிலேண்ட் என்ற பகுதியில் உள்ள செயின்ட் ஜான் ப்ராப்பர்ட்டீஸ் என்ற தனியார் ரியல் எஸ்டேட் நிறுவனம் மிகப்பெரிய அளவில் செயல்பட்டு வருகிறது. அமெரிக்காவில் உள்ள ரியல் எஸ்டேட் நிறுவனங்களில் முன்னணி நிறுவனங்களில் இந்த நிறுவனம் ஒன்று என்பது குறிப்பிடத்தக்கது. இந்த நிறுவனத்தின் ஊழியர்கள் மிகுந்த ஈடுபாட்டுடன் பணிபுரிந்ததால் இந்நிறுவனம் பெரும் வளர்ச்சி அடைந்தது.
இந்த நிலையில் தன்னுடைய நிறுவனத்தின் வளர்ச்சிக்கு காரணமாக இருக்கும் ஊழியர்களுக்கு மிகப்பெரிய அளவில் போனஸ் கொடுக்க அந்நிறுவனத்தின் தலைவர் விரும்பினார். இதனையடுத்து தனது ஊழியர்கள் அனைவருக்கும் ஒரு விருந்தை ஏற்பாடு செய்தார்.
பிரம்மாண்டமாக நடந்த இந்த விருந்தின் இடையே அனைவருக்கும் சிவப்பு நிற உறைகள் ஒன்று கொடுக்கப்பட்டது. இந்த உறைகள் எதற்காக கொடுக்கப்படுகிறது என ஊழியர்கள் மிகவும் ஆச்சரியத்துடன் காத்திருந்த நிலையில் நிறுவனத்தின் தலைவர் ஊழியர்களைப் பார்த்து அந்த உறைகளை பிரித்து பாருங்கள் என்று கூறினார்.
இதனை அடுத்து பிரித்துப் பார்த்த ஊழியர்கள் இன்ப அதிர்ச்சியில் உறைந்தனர். ஏனெனில் அந்த உறையில் அவரவர் பணியின் தகுதிக்கேற்ப போனஸ் தொகை வழங்கப்பட்டு இருந்தது. 200 டாலர் முதல் இரண்டு லட்சத்து 70 ஆயிரம் டாலர் வரை ஊழியர்களுக்கு போனஸ் தொகை கொடுக்கப்பட்டதாகவும், மொத்தம் உள்ள 200 ஊழியர்களுக்கும் சேர்த்து இந்திய மதிப்பில் சுமார் 70 கோடிக்கு மேல் போனஸ் தொகை வழங்கப்பட்டுள்ளதாகவும் செய்திகள் வெளியாகி உள்ளது. ஒரே ஒரு நிறுவனம் ரூபாய் 70 கோடிக்கும் மேல் போனஸ் கொடுத்த செய்தி அமெரிக்காவில் பெரும் ஆச்சரியத்தை ஏற்படுத்தியுள்ளது.