ஒவ்வொரு வீட்டிலும் பூஜை அறை அல்லது பூஜை செய்வதற்கான இடம் என தனியாக ஒதுக்கப்பட்டு இருக்கும். பூஜை செய்யும் இடத்திலும், பூஜைக்கு உரிய பொருட்களிலும் நாம் சின்ன சின்ன விஷயங்களின் மூலம் கவனம் செலுத்தினால், குடும்பத்தில் எந்த ஒரு சண்டை சச்சரவுகளும் இல்லாமல் நிம்மதி இருக்கும் என்பது சாஸ்திர நம்பிக்கை.

இந்த சில குறிப்புகளை பின்பற்றினால் பூஜை அறையை கையாள்வதும் சுலபமாக இருக்கும். சரி அப்படியான குறிப்புகள் என்னென்ன? என்பதை நீங்களும் தெரிந்து கொள்ள தொடர்ந்து இந்த பதிவை நோக்கி பயணியுங்கள்.

1. நீங்கள் கற்பூரம் வைக்கும் டப்பாவில் கற்பூரம் சீக்கிரம் கரைந்து விடுகிறது என்றால், அதில் நாலைந்து மிளகுகளை போட்டு வையுங்கள் கற்பூரம் கரையாமல் இருக்கும்.

2. பூஜை அறையில் நீங்கள் ஏற்றும் ஊதுபத்தி அதிக நேரம் நறுமணத்துடன் எரிய, ஊதுபத்தியில் முனையை விட்டுவிட்டு மற்ற பகுதிகளில் தண்ணீரை லேசாக தடவி விட்டு ஏற்றுவது நல்லது.

3. மஞ்சள் மற்றும் குங்குமத்தை பூஜை அறையில் வைக்கும் பொழுது அந்த டப்பாவில் ஒரு கற்பூரம் போட்டு வையுங்கள். எவ்வளவு நாட்கள் ஆனாலும் அதில் பூஞ்சைகள் பிடிக்கவும் செய்யாது, நமத்தும் போகாது.

4. பூஜை அறையில் மயிலிறகை வைத்துக் கொண்டால் குடும்பத்தில் சண்டை சச்சரவுகள் ஏற்படாமல் இருக்கும்.

5. அதேபோன்று குடும்பத்தில் சண்டை சச்சரவுகள் இல்லாமல் இருக்க, பூஜை அறையில் உங்கள் குலதெய்வத்திற்காக ஒரு மஞ்சள் துணியில் ஒரு ரூபாய் நாணயத்தை முடிந்து வையுங்கள். ஒவ்வொரு முறையும் உங்கள் குலதெய்வ கோவிலுக்கு செல்லும் பொழுது அதை காணிக்கையாக செலுத்துங்கள்.

6. பூஜை அறையில் இருக்கும் சாமி படங்களை துடைப்பதற்கு சிரமமாக இருந்தால், சிறிதளவு விபூதியை போட்டு துடைத்தால் பளிச்சென்று மாறிவிடும்.

7. சாமி படங்களுக்கு பூக்களை சொருகி வைக்கும் பொழுது பூக்கள் கீழே விழாமல் இருக்க படங்களின் பின்னால் பேனா மூடி போன்ற ஏதாவது ஒன்றை வைத்து செல்லோடேப் போட்டு ஒட்டி விடுங்கள். அல்லது படத்தை சுற்றிலும் மேல்புறமாக ரப்பர் பேண்ட் போட்டு கட்டி விடுங்கள். இப்பொழுது பூக்களை சொருக வசதியாகவும் கீழே விழாமலும் இருக்கும்.

8. விளக்கில் திரியை போட்டபின் திரியின் நுனியில் சிறிதளவு கற்பூரத்தை நொறுக்கி தடவி விட்டு ஏற்றினால் சுலபமாக திரி பற்றிக் கொள்ளும். எவ்வளவு காற்று வீசினாலும் அணையாது.

9. பூஜை அறையை துடைக்கும் பொழுது சிறிதளவு கற்பூரத்தை நொறுக்கி போட்டு துடைத்து எடுத்தால் எந்த ஒரு பூச்சிகளும், எறும்புகளும், ஈக்களும் அணுகாது. பூஜை அறையும் தெய்வீக மணமாக நீண்ட நேரம் இருக்கும்.

10. கம்ப்யூட்டர் சாம்பிராணி ஏற்றும்பொழுது அதன் மீது ஒரு சூடத்தை வைத்து ஏற்றினால், சூடம் எரிந்து சாம்பிராணி வேகமாக நறுமணத்துடன் எரியும். இதனால் நெருப்பில் நீண்ட நேரம் சாம்பிராணியை பிடித்துக் கொண்டிருக்க வேண்டிய அவசியம் இல்லை.