இந்தியர்களுக்கான முக்கிய ஆவணமாக விளங்குவது ஆதார் அட்டை. இதில் நம்முடைய முக்கிய ஆவணங்களும் இணைக்கப்பட்டுள்ளது குறிப்பிடத்தக்கது.
என்னுடைய ஆதார் கார்டை யாராவது தவறாக பயன்படுத்தினால் அதனை நாம் எப்படி கண்டுபிடிப்பது மற்றும் அதனை எவ்வாறு கண்காணிப்பது போன்ற தகவல்களை இந்த செய்தி தொகுப்பில் காண்போம்.
அரசாங்க சேவைகள், வங்கி வசதிகள் மற்றும் தொலைத்தொடர்பு இணைப்புகள் என பலவற்றை அணுகுவதற்கு இந்த 12 இலக்க தனித்துவமான ஐடி (Unique ID) முக்கியமானது. இந்த ஆவணம் பல நிர்வாகச் செயல்முறைகளை எளிதாக்கும் அதே வேளையில், கவனமாகக் கையாளப் படாவிட்டால், தவறாகப் பயன்படுத்தப்படக் கூடிய அபாயமும் உள்ளது என்பது குறிப்பிடத்தக்கது.
அதனுடன் இணைக்கப்பட்ட தகவல்களை வைத்து, மோசடி ஆசாமிகள் நிதி மோசடி, அடையாள திருட்டு அல்லது சேவைகளுக்கான அங்கீகாரமற்ற அணுகல் ஆகியவற்றிற்காக திருடப்பட்ட ஆதார் விவரங்களைப் பயன்படுத்துவதாகக் கூறப்படும் பல சம்பவங்கள் கடந்த சில ஆண்டுகளாக அரங்கேறி வருகின்றன.
உங்களுடைய ஆதார் தவறாக பயன்படுத்தப்படுகிறதா என்பதை சரி பார்க்க :-
மக்கள் தங்கள் ஆதாரை பாதுகாப்பாக வைத்திருக்கவும், அதன் பயன்பாட்டைக் கண்காணிக்கவும், இந்திய தனித்துவ அடையாள ஆணையம் (UIDAI) பயனர்கள் தங்கள் ஆதார் பயன்பாட்டைக் கண்காணிக்கவும், பாதுகாக்கவும் உதவும் வழிகளை அறிமுகப்படுத்தியுள்ளது.
✓ myAadhaar போர்ட்டலுக்குச் செல்லவும்.
✓ உங்கள் ஆதார் எண், கேப்ட்சா குறியீட்டை உள்ளிட்டு, “OTP மூலம் உள்நுழை” என்பதைக் கிளிக் செய்யவும்.
✓ உங்கள் பதிவு செய்யப்பட்ட மொபைல் எண்ணுக்கு OTP அனுப்பப்படும். உங்கள் கணக்கை அணுக அதை உள்ளிடவும்.
✓ “அங்கீகரிப்பு வரலாறு (Authentication History)” விருப்பத்தைத் தேர்வு செய்து, நீங்கள் மதிப்பாய்வு செய்ய விரும்பும் காலத்திற்கான தேதி வரம்பைத் தேர்வு செய்யவும்.
✓ பதிவைச் சரிபார்த்து, ஏதேனும் அறிமுகமில்லாத அல்லது சந்தேகத்திற்கிடமான பரிவர்த்தனைகள் உள்ளதா என்பதை சரி பார்க்கவும். ஒருவேளை அங்கீகரிக்கப்படாத செயல்பாட்டை நீங்கள் கண்டறிந்தால், உடனடியாக UIDAI-க்கு புகாரளிக்கவும்.
