இந்தியா மற்றும் ஆப்கானிஸ்தான் அணிகள் உலக கோப்பை கால்பந்து தகுதி சுற்று ஆட்டத்தில் இன்று பலப்பரீட்சை

உலக கோப்பை கால்பந்து தகுதி சுற்று ஆட்டத்தில் இந்தியா-ஆப்கானிஸ்தான் அணிகள் இன்று மோதுகின்றன

22-வது உலக கோப்பை கால்பந்து போட்டி 2022-ம் ஆண்டு கத்தார் நாட்டில் நடைபெற உள்ளது. இதில் ஆசிய கண்டத்திற்கான தகுதி சுற்றின் 2-வது ரவுண்டில் இடம் பெற்றுள்ள 40 அணிகள் 8 பிரிவாக பிரிக்கப்பட்டுள்ளன. ஒவ்வொரு அணியும் உள்ளூர்-வெளியூர் அடிப்படையில் தலா ஒரு முறை மோத வேண்டும்.

இதில் இந்திய அணி தனது 4-வது லீக் ஆட்டத்தில் இன்று (வியாழக்கிழமை) ஆப்கானிஸ்தானை எதிர்கொள்கிறது. இந்த ஆட்டம் தஜிகிஸ்தான் நாட்டில் துஷான்பே நகரில் உள்ள செயற்கை மைதானத்தில் நடக்கிறது.

இந்திய அணி தனது முதலாவது லீக் ஆட்டத்தில் 1-2 என்ற கோல் கணக்கில் ஓமனிடம் தோல்வி அடைந்தது. 2-வது ஆட்டம் கோல் எதுவுமின்றி ஆசிய சாம்பியனான கத்தாருடன் ட்ராவில் முடிந்தது. 3-வது ஆட்டமும் 1-1 என்ற கோல் கணக்கில் வங்காளதேச அணியுடன் ட்ராவில் முடிந்தது.எனவே இந்தியா அனி ஆப்கானிஸ்தான் அணியுடன் வெற்றி பெற வேண்டும் என்று தீவிர முனைப்பில் உள்ளது.

ஆப்கானிஸ்தான் அணி தனது முதல் லீக் ஆட்டத்தில் 0-3 என்ற கோல் கணக்கில் ஓமனிடமும், 0-6 என்ற கோல் கணக்கில் கத்தாரிடமும் தோல்வியை சந்தித்தது. மூன்றாவது லீக் ஆட்டத்தில் 1-0 என்ற கோல் கணக்கில் வங்காளதேசத்தை வென்றது.இந்தியாவுக்கு எதிரான போட்டியிலும் வெற்றியை தொடரவேண்டும் என்ற முனைப்பில் ஆப்கானிஸ்தான் களமிரங்கவுள்ளது.

இந்தியா-ஆப்கானிஸ்தான் அணிகள் இதுவரை 8 முறை நேருக்கு நேர் மோதி இருக்கின்றன. இதில் இந்தியா 6 முறையும், ஆப்கானிஸ்தான் ஒரு முறையும் வெற்றி பெற்றுள்ளன. ஒரு ஆட்டம் டிராவில் முடிந்துள்ளது.இன்றைய ஆட்டம் நடைபெறும் மைதானம் செயற்கை மைதானம் என்பதால் இரு அணிகளுக்கும் இடையே கடும் போட்டி நிலவும் என எதிர்பார்க்கப்படுகிறது.