திரையுலகில் பெரும்பாலும் சர்ச்சையிலிருந்து விலகி இருந்து வந்த நடிகர் ஸ்ரீகாந்த், தற்போது போதைப்பொருள் வழக்கில் கைது செய்யப்பட்ட சம்பவம் திரையுலகிலும், ரசிகர்களிடையிலும் பெரும் அதிர்ச்சியை ஏற்படுத்தியுள்ளது.

ரோஜா கூட்டத்தில் இருந்து… போலீஸ் விசாரணை வரை!

தமிழ் சினிமாவில் “ரோஜா கூட்டம்” படத்தின் மூலம் அறிமுகமான நடிகர் ஸ்ரீகாந்த், தனது நீண்டகால கேரியரில் சர்ச்சைகளைத் தவிர்த்து வந்தவர். விஜய்யுடன் “நண்பன்” உள்ளிட்ட பல திரைப்படங்களில் முக்கிய வேடங்களில் நடித்தவர். ஆனால் தற்போது அவர் மீது போதைப்பொருள் (கொகைன்) பயன்படுத்தியதாக குற்றச்சாட்டு எழுந்து, போலீசார் கைது செய்துள்ளனர்.

அதிமுக ஐடி விங் முன்னாள் நிர்வாகியுடன் தொடர்பு?

போதைப்பொருள் தடுப்பு பிரிவினரின் விசாரணையின்போது, ஸ்ரீகாந்த், அதிமுக தகவல் தொழில்நுட்ப பிரிவு முன்னாள் நிர்வாகி பிரசாத் என்பவரிடம் இருந்து கொகைன் வாங்கியதாக போலீசார் கூறுகின்றனர்.

இவர்கள் இருவரும் “தீங்கிரை” என்ற படத்தில் கதாநாயகனாக ஸ்ரீகாந்த் நடிக்க, பிரசாத் தயாரிப்பாளராக இருந்துள்ளார். இதன் மூலம் நெருக்கம் அதிகமாகி, 3 முறை போதைப்பொருள் வாங்கியதாகவும், 4-வது முறையிலும் வாங்க முயன்றதாகவும் ஸ்ரீகாந்த் கூறியதாக தகவல் வெளியாகியுள்ளது.

மருத்துவ பரிசோதனையிலும் உறுதி!

போலீசாரின் சம்மனுக்கு , ஸ்ரீகாந்த் நுங்கம்பாக்கம் காவல் நிலையத்தில் ஆஜரானார். விசாரணையில், போதைப் பழக்கம் இல்லை என மறுத்து வந்த அவர், கீழ்பாக்கம் மருத்துவமனையில் மேற்கொள்ளப்பட்ட பரிசோதனையில் போதைப்பொருள் பயன்படுத்தியதாக உறுதி செய்யப்பட்டது.

இதையடுத்து, அவரை போலீசார் அதிரடியாக கைது செய்து காவலுக்கு எடுத்துச் சென்றனர்.

“தவறு செய்துவிட்டேன்” – ஸ்ரீகாந்தின் ஒப்புதல்

பிரசாத் தன்னிடம் சம்பளமாக ₹10 கோடி பாக்கி வைத்திருந்ததாகவும், அதை பெற்றுக்கொள்ளும் நோக்கத்தில்தான் போதைப்பொருள் வாங்கியதாகவும் ஸ்ரீகாந்த் போலீசாரிடம் வாக்குமூலம் அளித்துள்ளார். மேலும், “தவறு செய்துவிட்டேன்” என ஒப்புக்கொண்டதாக தகவல்கள் தெரிவிக்கின்றன.

இதுவரை எந்த விதமான விமர்சனத்திற்கும் ஆளாகாமல் இருந்த நடிகர் தற்போது போதை பொருள் பயன்படுத்திய வழக்கில் கைதாகியுள்ளது தமிழ் திரைத்துறையில் பரபரப்பை ஏற்படுத்தியுள்ளது.