DMK TVK: திமுக கூட்டணியிலிருந்து தமிழக வாழ்வுரிமைக் கட்சி விலகப் போவதாக தகவல்கள் வெளியாகி வருகிறது. சமீபத்தில் தமிழக வாழ்வுரிமைக் கட்சி வேல்முருகன் மற்றும் திமுகவிற்கிடையே சில கருத்து வேறுபாடுகள் இருந்து வருகிறது. இதற்கு முன்னதாகவே தனது எம்எல்ஏ பதவியை துறப்பதாகவும் வேல்முருகன் கூறியுள்ளார். ஆனால் சில சமாதானங்களுக்கு பிறகு கட்சியில் இருக்க சம்மதித்தார். இப்படி இருக்கையில் நேற்று கூட பாலியல் வன்கொடுமை நடக்க பெண்களின் ஆடை தான் காரணம் என்றும் பேசினார்.

இது இணையத்தில் பெரும் வைரலாகி பல கண்டனங்கள் முன்வைக்கப்பட்டது. இதனையடுத்து உடனடியாக இன்று நடந்த பட்ஜெட் கூட்டு தொடரில் சபாநாயகருக்கு முன்பாக குரல் உயர்த்தி கடுமையாக பேசியுள்ளார். இதன் உச்சகட்டமாக அமைச்சர் சேகர்பாபு மற்றும் வேல்முருகன் இடையே வாய் தகராறு ஏற்பட்டுள்ளது. அக்கணமே இதனைக் கண்டு முதல்வர் ஸ்டாலின் கண்டித்துள்ளார். அதுமட்டுமின்றி இவர் மீது நடவடிக்கை எடுக்கும் படியும் சபாநாயகர் அப்பாவுவிடம் கோரிக்கையும் வைத்தார்.

ஆனால் சபாநாயகர் இதனை ஒரு முறை மன்னித்து விடுவதாக கூறிவிட்டார். இப்படி கூட்டணி கட்சிக்குள் இருப்பவர் மீது நடவடிக்கை எடுக்க பரிந்துரை செய்ததால் இனி திமுகவுடன் கை கோர்க்க வாய்ப்பே இல்லை எனக் கூறுகின்றனர். மாறாக பாமக உடன் கூட்டணி வைக்க அதிக வாய்ப்புள்ளதாகவும் தகவல்கள் வெளியாகி உள்ளது. சமீபத்தில் பாமகவின் நிதி நிழல் அறிக்கையை கூட நிர்வாகிகள் இவரிடம் கொடுத்துள்ளனர். அதுமட்டுமின்றி இவரும் பாமக வுடன் இணைவதில் சற்று ஆர்வம் காட்டி வருகிறார். அந்த வகையில் திமுகவின் கூட்டணியை துண்டித்து விட்டு பாமக உடன் இணைந்து 2026 சட்டமன்றத் தேர்தலை எதிர்கொள்வார் என அரசியல் விமர்சகர்கள் கூறுகின்றனர்.