News4 TamilOnline Tamil News

DMK: கரூர் மாவட்டத்தில் திமுகவின் ஓரணியில் தமிழ்நாடு என்ற இயக்கத்தின் சார்பில் தமிழ்நாட்டை தலைகுனிய விட மாட்டேன் என்ற தலைப்பில் பொதுக்கூட்டம் நடைபெற்றது. இந்த கூட்டத்தின் சிறப்பு விருந்தினராக திமுகவின் எம்பி திருச்சி சிவா கலந்து கொண்டார். இவர் 1996 முதல் இன்று வரை திமுகவில் முக்கிய நிர்வாகியாக உள்ளார். தமிழகத்தின் திமுகவின் மாநிலங்களவை எம்பியாக இருக்கிறார்.

இக்கூட்டத்தில் அதிகளவில் திமுக நிர்வாகிகள், தொண்டர்கள், திருச்சி சிவாவின் ஆதரவாளர்கள் என பலரும் கலந்து கொண்டனர். இந்த கூட்டத்தில் திருச்சி சிவா பேசி கொண்டிருக்கும் போது செந்தில் பாலாஜி வந்ததால் மேடையில் இருந்த தலைவர்களும், கீழே இருந்த தொண்டர்களும் மரியாதை நிமித்தமாக எழுந்து நின்று வரவேற்பளித்தனர்.

இதனை கண்ட திருச்சி சிவா “யோவ் யாரா இருந்த என்ன? இங்க பாரு, அவர் பாட்டுக்கு வராரு, நீங்க ஏன் அங்க பாக்குறீங்க, நான் அடி வயிற்றிலிருந்து பேசிட்டு இருக்கேன்” என கோபமாக பேசியிருக்கிறார். பிறகு செந்தில் பாலாஜி அவரிடம் மன்னிப்பு கேட்டு சால்வை அணிவித்தார். திருச்சி சிவா கோபமாக பேசிய வீடியோ தற்போது இணையத்தில் வைரலாகி வருகிறது.

சமீப காலமாகவே திமுகவில் உட்கட்சி பூசல் தொடர்ந்து கொண்டிருக்கிறது. கூட்டணி கட்சிகளும் திமுக தலைமைக்கு எதிராக செயல்பட்டு வருகின்றன. திருச்சி சிவாவின் இந்த செய்கை செந்தில் பாலாஜிக்கும், இவருக்கும் ஏற்கனவே சண்டை நடந்ததற்கு அறிகுறியாக பார்க்கப்படுகிறது. இந்த சண்டை தொடரும் என்று எதிர்ப்பார்க்கபடுகிறது. ஏற்கனவே தொகுதி பங்கீட்டில் சிக்கி தவிக்கும் திமுகவிற்கு இது புதிய சர்ச்சையாக எழுந்துள்ளது.

ADMK: மக்களை காப்போம் தமிழகத்தை மீட்போம் என்ற பிரச்சார பயணத்திற்காக அதிமுக முன்னாள் அமைச்சர் செங்கோட்டையனின் தொகுதியான கோபிசெட்டிபாளையம் வழியாக இன்று நீலகிரிக்கு சென்ற இபிஎஸ்-க்கு கோபிசெட்டிபாளையத்தில் உற்சாக வரவேற்பு அளிக்கப்பட்டது. ஜெயலலிதா ஆட்சிகாலம் முதல் இன்று வரை கோபிசெட்டிபாளையம் செங்கோட்டையனின் முகமாக கருதப்பட்டு வருகிறது. கோபி தொகுதியில் 1980 முதல் 2016 வரை 7 முறை செங்கோட்டையன் எம்.எல்.ஏவாக இருந்திருக்கிறார்.

அப்போதிலிருந்து இப்போது வரை அந்த பகுதியில் இவர் செல்வாக்கு மிக்கவராகவும், பொது மக்களின் கோரிக்கைகளை கேட்டு நிறைவேற்றும் நல்ல தலைவராகவும் செயல்பட்டு வருகிறார். மேலும் வனத்துறை, வேளாண்மை துறை, சுற்றுசுழல் துறை, வருவாய் துறை, பள்ளி கல்வி துறை, விளையாட்டு மற்றும் இளைஞர் நலன் மேம்பாட்டுத் துறை என பல்வேறு துறைகளில் அமைச்சராக பணியாற்றி இருக்கிறார். ஒருங்கிணைக்க வேண்டுமென்று 10 நாட்கள் கெடு விதித்திருந்த செங்கோட்டையனை கட்சியிலிருந்து நீக்கினார் இபிஎஸ்.

இதனை தொடர்ந்து செங்கோட்டையனின் ஆதரவாளர்கள் பலரும் அவரை சந்தித்து வந்தனர். நேற்று முன்தினம் கூட 200க்கும் மேற்பட்ட ஆதரவாளர்கள் செங்கோட்டையனின் வீட்டிற்கு சென்றது குறிப்பிடத்தக்கது. செங்கோட்டையனை கட்சியிலிருந்து நீக்கியதால் அவரின் தொகுதியில் அதிமுக தோல்வியை தழுவும் என்று எதிர்பார்க்கப்பட்டது. ஆனால் இந்த தொகுதியில் இபிஎஸ்க்கு யாரும் எதிர்பார்த்திராத அளவு வரவேற்பு அளிக்கப்பட்டது ஆச்சிரியத்தை ஏற்படுத்தியுள்ளது.

இதன் மூலம் செங்கோட்டையனின் குரலுக்கு அப்பகுதி மக்கள் செவிசாய்க்கவில்லை என்பதையும், அங்கு இன்னும் அதிமுக ராஜ்ஜியமே நடந்து கொண்டிருக்கிறது என்பதற்கும் எடுத்துக்காட்டாக இது உள்ளதென இபிஎஸ் ஆதரவாளர்கள் கூறி வருகின்றனர்.

NDA ADMK: தமிழக அரசியலின் பரபரப்பான சூழலுக்கு மத்தியில் நயினார் நாகேந்திரன் டெல்லி சென்றிருப்பது கவனத்தை ஈர்த்துள்ளது. இரு தினங்களுக்கு முன்பு அதிமுக பொதுச்செயலாளர் எடப்பாடி பழனிச்சாமியை அவரது இல்லத்தில் சந்தித்து பேசினார் நயினார் நாகேந்திரன். மரியாதையை நிமித்தம் காரணமாகவே இந்த சந்திப்பு நிகழ்த்தப்பட்டதாக கூறினார். இதற்கு பிறகு பாஜக முன்னாள் மாநில தலைவர் அண்ணாமலை, டிடிவி தினகரனை அவரது இல்லத்தில் சந்தித்து பேசியது குறிப்பிடத்தக்கது.

இதன் தொடர்ச்சியாக டெல்லி சென்ற நயினார் நாகேந்திரன் அமித்ஷாவையும், பாஜக தேசிய தலைவர் ஜே.பி நட்டாவையும் சந்தித்தார். மேலும், தமிழகத்தில் வரும் அக்டோபர் மாதம் நயினார் நாகேந்திரனின் சுற்றுப்பயணம் தொடங்க உள்ளது. இந்த தேர்தல் பிரச்சாரத்தில் ஜே.பி. நட்டாவையும் கலந்து கொள்ளுமாறு கோரிக்கை விடுத்ததாகவும், அதற்கு அவர் முடிந்த வரை வருகிறேன் என்று கூறியதாகவும் கூறினார். கூட்டணியில் புதிய கட்சிகளை இணைப்பது குறித்து ஆலோசனை மேற்கொள்ளப்பட்டதாகவும் கூறினார்.

யார் யாருடன் பேச்சு வார்த்தை நடைபெற்று வருகிறது, யாரெல்லாம் கூட்டணிக்கு வர தயாராக உள்ளனர் என்பது பற்றி ஜே.பி. நட்டா கேட்டறிந்ததாக நயினார் நாகேந்திரன் கூறினார். தற்போது பாமக, தேமுதிக போன்ற பெரிய கட்சிகளை அதிமுக கூட்டணியில் சேர்ப்பதற்கான நடவடிக்கை மேற்கொள்ளப்பட்டு வருவதாகவும் தகவல் வெளிவந்துள்ளது. மேலும் வரவிருக்கும் சட்டமன்ற தேர்தலையொட்டி தமிழக பாஜக முன்னேடுத்துள்ள வீயூகங்கள் தொடர்பாக ஆலோசனை மேற்கொள்ளப்பட்டுள்ளது. நயினார் நாகேந்திரனின் இந்த டெல்லி பயணம் அரசியல் களத்தில் முக்கியத்துவம் பெற்றுள்ளது.

ADMK AMMK: தே.ஜ.கூட்டணியிலிருந்து ஓபிஎஸ்-யும், டிடிவி தினகரனும் வெளியேறியதிலிருந்து இருவரும் ஒருவருக்கொருவர் ஆதரவு தெரிவித்து வருகின்றனர். அதிலும் குறிப்பாக டிடிவி தினகரன் ஓபிஎஸ்-யை பயன்படுத்தி அதிமுகவையும், பாஜகவையும் வீழ்த்திவிடலாம் என திட்டம் தீட்டி வந்ததாக பேசப்பட்டது. இருவரும் கூட்டணி அமைப்பார்கள் என்றும் எதிர்பார்க்கப்பட்டது.

நயினார் நாகேந்திரன் மீதும், இபிஎஸ் மீதும் தொடர்ந்து கடுமையான தாக்குதலை நடத்தி வந்தார் டிடிவி தினகரன். NDA கூட்டணியிலிருந்து விலகியதற்க்கும் நயினார் நாகேந்திரன் தான் காரணம் என்று கூறினார். இதனை தொடர்ந்து நேற்று முன்தினம் சேலம் வந்த பாஜக மாநில தலைவர் நயினார் நாகேந்திரன் அதிமுக பொதுச்செயலாளரும், எதிர்க் கட்சி தலைவருமான எடப்பாடி பழனிசாமியை அவரது வீட்டில் சந்தித்தார்.

இந்த சந்திப்பில் கட்சியிலிருந்து நீக்கிய ஓபிஎஸ்யை மீண்டும் கட்சியில் இணைப்பது தொடர்பாக பேச்சுவார்த்தை நடத்தப்பட்டதாகவும், அதற்கு சில நிபந்தனைகளுடன் இபிஎஸ் சம்மதம் தெரிவித்தார் என்றும் கூறப்படுகிறது. இந்த முடிவு டிடிவி தினகரனுக்கு எதிரான சதித்திட்டம் என்றும் சொல்லப்படுகிறது.

தினகரனுக்கு ஆதரவாக இருக்கும் ஓபிஎஸ்யை கட்சியில் இணைத்துக் கொண்டால் தினகரன் தனித்து நிற்பார் என்பது தான் இவர்களது திட்டம் என்று அரசியல் வட்டாரங்கள் கருத்து தெரிவிக்கின்றன. தற்போது ஓபிஎஸ் என்ன பதிலளிப்பார் என்று அவரது நடவடிக்கைகளை உன்னிப்பாக கவனித்து வருகிறார் டிடிவி தினகரன்.

ஏற்கனவே அதிமுக பல அணிகளாக பிரிந்திருக்கிறது, அதோடு அதிமுகவிற்கும், பாஜகவிற்கும் இடையே சச்சரவு நிலவி வருகிறது என்று கூறப்பட்டு வரும் வேளையில் இவர்களின் சந்திப்பில் மேலும் என்னென்ன முடிவுகள் எடுக்கப்பட்டுள்ளது என்பது அரசியல் களத்தில் பேசுபொருளாகியுள்ளது.

DMK TVK ADMK: கட்சி ஆரம்பித்த ஒரு வருடத்திலேயே விஜய்யுடன் யார் கூட்டணி அமைக்க போகிறார்கள் என்பது மிகுந்த ஆர்வத்தை ஏற்படுத்தியுள்ளது. ஆனால் கூட்டணி குறித்து ஜனவரியில் தான் முடிவு எடுக்கவேண்டும் என்று விஜய் உறுதியாக உள்ளார். இந்நிலையில் திமுக கூட்டணியில் உள்ள முக்கிய கட்சிகள் தனக்கான ஆட்சி பங்கையும், அதிக தொகுதிகளை ஒதுக்காவிட்டால் தவெகவுடன் கூட்டணி அமைத்து கொள்வோம் என்று கூறி வருகின்றனர்.

இது சட்டமன்ற தேர்தலில் ஆட்சியை கைப்பற்ற வேண்டுமென தீவிரமாக உழைத்து வரும் திமுகவிற்கு பெரும் சிக்கலை ஏற்படுத்தியுள்ளது. விஜய் தொடர்ந்து திமுகவை எதிர்த்து வருவதால், கூட்டணி கட்சிகளின் வாக்கும், திமுக மீது அதிருப்தியில் இருக்கும் தொண்டர்களின் வாக்கும் தவெகவிற்கு செல்லும் என்ற கருத்தும் நிலவுகிறது.

ஆனால் மற்றொரு புறம் திமுகவிற்கு மாற்று அதிமுக தான் என நினைக்கும் தொண்டர்களின் வாக்கு அதிமுகவிற்கு செல்லும் என்றும் கூறப்படுகிறது. விஜய்யின் பிரச்சாரமும், திமுக கூட்டணி கட்சிகளின் கோரிக்கைகளும் ஒரு வகையில் அதிமுகவிற்கு சாதகமாக மாற வாய்ப்பிருக்கிறது.

TVK: தமிழக சட்டமன்ற தேர்தல்  இன்னும் 8 மாத காலங்களில் நடைபெற உள்ளது. ஆனால் எந்த ஒரு கட்சியும் கூட்டணியில் உறுதியாக இருப்பதாக தெரியவில்லை. மாறாக திமுகவில் இருப்பவர்கள் அதிமுகவிலும், அதிமுகவில் இருப்பவர்கள் தமிழக வெற்றிக் கழகத்திலும் சேர்ந்து வருகின்றனர். உறுப்பினர்களே உறுதியான நிலைப்பாட்டில் இல்லாமலிருப்பது ஒட்டுமொத்த அரசியல் கட்சியின் நம்பகத்தன்மையை இழக்க வைக்கிறது. அதிலும் உட்கட்சி பூசல் ஒவ்வொரு கட்சியிலும் உள்ளது.

அதற்கு முடிவு எட்டப்படாத நிலையில் பாஜகவை அனைவரும் நாடுகின்றனர். சிலர் இந்த வாய்ப்பை பயன்படுத்தி கூட்டணியில் மாற்றத்தை ஏற்படுத்த வேண்டும் என்ற முனைப்போடும் உள்ளனர். இந்நிலையில் தமிழக வெற்றிக் கழகம் தங்களுடன் யார் கூட்டணி வைத்துக்கொண்டாலும் அவர்களுக்கு ஆட்சியில் பங்கு என கூறியுள்ளது. ஆனால் தற்போது அக்கட்சியின் கொள்கை பரப்பு பொதுச்செயலாளர் நாங்கள் தனி பெரும்பான்மையுடன் 30 சதவீத வாக்கு வங்கியில் வெற்றி பெறுவோம் என கூறியுள்ளார்.

அந்த வகையில் இவர்கள் இனி யாருடனும் கூட்டணி வைக்க மாட்டார்களா என்ற கேள்வி எழுந்துள்ளது. மேலும் இது ரீதியாக அவர் பேசுகையில், கிட்டத்தட்ட ஐம்பது ஆண்டுகளாக இரு கட்சிகளே மாறி மாறி ஆட்சியைப் பிடித்து வருகின்றனர். இதில் ஏதேனும் மாற்றம் வராதா என்று எதிர்பார்ப்பு அனைவர் மத்தியில் உள்ளது. அதேபோல 40 கோடி ரூபாய் செலவு செய்து வெற்றி பெறும் கட்சியால் மக்கள் நன்மை பெற முடியாது, இனிவரும் நாட்களில் ஏதேனும் நன்மை நடக்க வேண்டுமென்றால் அது தமிழக வெற்றிக் கழகம் வந்தால் தான் முடியும்.

மற்ற கட்சியை காட்டிலும் தமிழக வெற்றிக்கழகத்திற்கு சேரும் கூட்டம் மிகவும் வித்தியாசமான ஒன்று. மற்றவர்கள் பணத்தைக் காட்டி கூட்டத்தை கூட்டுகின்றனர். ஆனால் இங்கு தன்னெழுச்சியாக கூட்டம் கூடுகிறது. அதேபோல கடந்த 1977 ஆம் ஆண்டு எம்ஜிஆர் 33 சதவீத வாக்குகளுடன் ஆட்சி அமைத்தார். அச்சமயம் நான்கு முனை போட்டி இருந்தது. அதுவே இம்முறை பல முனைப் போட்டி இருந்தும் தமிழக வெற்றிக் கழகம் 35% வாக்கு பெற்று தனி பெருமான்மையுடன் ஆட்சி அமைக்கும்.

மேலும் மற்ற கட்சியை போல் எங்களுக்கு மத்திய அரசோடும் சமரச செய்ய வேண்டிய அவசியம் இல்லை. பிறர் கட்சியினர் தங்களின் ஊழலை மறைக்கவே பாஜகவுடன் கைகோர்க்கின்றனர். ஆனால் எங்களின் கொள்கை எதிரியே பாஜக தான். தொடர்ந்து திமுக குறித்து பல விமர்சனங்களை முன்வைத்து பேசியும் உள்ளார். இவர் கூறியதைப்போல் தனி பெரும்பான்மையுடன் 35 சதவீதம் அளவில் தமிழக வெற்றிக் கழகம் வாக்கு வங்கியை நிரப்பும் பட்சத்தில் கூட்டணிக்கான அவசியம் அவர்களுக்கு தேவைப்படாது.

DMK DMDK: 2026 தேர்தலையொட்டி தேர்தல் களம் பரபரப்பாகியுள்ளது. இந்த முறையும் எப்படியாவது ஆட்சியை பிடித்து விட வேண்டுமென்று திமுக பல்வேறு முயற்சிகளை செய்து வருகிறது. இதற்கு முட்டுக்கட்டை போடும் விதமாக கூட்டணி கட்சிகள் தங்களுக்குரிய ஆட்சி பங்கையும், தொகுதிகளையும் ஒதுக்க வேண்டுமென்று திமுக தலைமையை வலியுறுத்தி வருகின்றன.

இல்லையென்றால் கூட்டணியை விட்டு விலகுவதாக கூறி வந்தனர். இந்நிலையில் தேமுதிக, திமுகவுடன் கூட்டணி அமைப்பதற்கான ஏற்பாடுகளை செய்து வருவதாக தகவல் வெளியாகியுள்ளது. தேமுதிக கூட்டணியில் இணைய சில நிபந்தனைகளை முன் வைத்ததாகவும், அது குறித்து திமுக தலைமை பரிசீலித்து வருவதாகவும் கூறப்படுகிறது.

அந்த நிபந்தனை என்னவென்றால் பொதுவாக திமுக கூட்டணியில் போட்டியிடும் கட்சிகள், உதயசூரியன் சின்னத்தில் தான் தேர்தலை எதிர் கொள்வார்கள். ஆனால் தேமுதிக அவர்களது சின்னத்தில் தான் போட்டியிடுவோம் என்றும், தேமுதிகவிற்கு அதிக தொகுதிகள் ஒதுக்கப்பட வேண்டுமென்றும் கூறியுள்ளனர்.

திமுகவின் உட்கட்சி பூசலை பயன்படுத்தி கொண்டு பிரேமலதா விஜயகாந்த் இந்த நிபந்தனையை விதித்திருப்பதாக சிலர் கூறுகின்றனர். ஏற்கனவே கூட்டணி கட்சிகள் கூட்டணியை விட்டு விலகுவதாக கூறப்பட்டு வரும் நிலையில், தேமுதிகவின் இந்த வாய்ப்பையும் தவறவிட்டால் நடைபெறவிருக்கும் சட்டமன்ற தேர்தலில் திமுக தோல்வியை தழுவும் என்று அரசியல் ஆர்வலர்கள் கூறி வருகின்றனர்.

ADMK: இபிஎஸ் முதல்வரான பிறகு அதிமுகவின் முக்கிய முகங்களாக அறியப்பட்ட பலரையும் கட்சியிலிருந்து நீக்க உத்தரவு பிறப்பித்தார். அதில் ஒருவர் தான் ஓபிஎஸ். கட்சியின் சின்னமான இரட்டை இலை இபிஎஸ்க்கு செல்லுமா இல்லை ஓபிஎஸ் அணிக்கு செல்லுமா என்று கேள்வி எழுந்த போது, அது இபிஎஸ்க்கு தான் என்று தேர்தல் ஆணையம் தீர்ப்பு வழங்கியது.

இந்நிலையில் ஓபிஎஸ், அதிமுக தொண்டர்கள் உரிமை மீட்புக் குழு ஒன்றை தொடங்கினார். இதனை தொடர்ந்து அதிமுக ஒன்றிணைய வேண்டுமென்று பலரும் கூறி வந்த நிலையில் செங்கோட்டையனும் இதனையே கூறினார். இது தொடர்பாக டெல்லி சென்ற செங்கோட்டையன் மத்திய அமைச்சர்கள் சிலரை சந்தித்தார். இவருக்கு பிறகு டெல்லி சென்ற இபிஎஸ் பிரிந்தவர்களை இணைக்க முடியாது என்று திட்டவட்டமாக கூறினார்.

அடுத்ததாக தமிழக பாஜகவின் தற்போதைய தலைவர் நயினார் நாகேந்திரன் சேலம் வந்திருந்த போது இபிஎஸ் வீட்டிற்கு சென்றார். இவர் என்ன பேசி இருப்பார் என்று கேள்விகள் எழுந்த நிலையில், செய்தியாளர்களை சந்தித்த அவர் சுற்றுப்பயணம் மேற்கொள்வது தொடர்பாக பேசியதாக கூறினார்.

ஆனால் இவர்களின் சந்திப்பு பற்றி அரசியல் வல்லுனர்களின் கருத்து என்னவென்றால், ஓபிஎஸ்யை மீண்டும் கட்சியில் இணைக்க இருப்பதாகவும், அவருக்கு முக்கிய பொறுப்புகள் வழங்க இருப்பதாகவும், விவாதங்கள் நிகழ்ந்ததாக சொல்லப்படுகிறது. இதற்கு இபிஎஸ்யும் ஒப்பு கொண்டார் என்றும் கூறப்படுகிறது. இதற்கு ஓபிஎஸ் என்ன பதிலளிப்பார் என்பது கேள்விக்குறியாக உள்ளது.

ADMK: முன்னாள் முதலமைச்சர் ஜெயலலிதா இறந்த பின், டிடிவி தினகரன், சசிகலா, ஓபிஎஸ், இபிஎஸ் என அதிமுக பல அணிகளாக பிரிந்திருக்கிறது. அவர்களின் தீவிர ஆதரவாளர்களும் அவர்கள் பக்கம் நின்றனர். இந்நிலையில் நீண்ட காலமாக அரசியலில் இருந்து விலகியிருந்த சசிகலா செங்கோட்டையனின் ஒருங்கிணைப்பு நடவடிக்கைகளுக்கு குரல் கொடுக்க முன்வந்தார்.

இதனை தொடர்ந்து சசிகலாவின் தீவிர ஆதரவாளரான வெண்மதி தனியார் தொலைக்காட்சி ஒன்றுக்கு பேட்டியளித்த போது அதிமுகவை ஒன்றிணைக்க சசிகலா எந்த முயற்சியும் எடுக்கவில்லை என்றும், இன்னமும் காலம் தாழ்த்திக் கொண்டே செல்வதால் என்னால் என்னுடன் இருப்பவர்களிடம் பதில் சொல்ல முடியவில்லை என்றும், அதனால் அவரிடம் இருந்து விலகுவதாகவும் தெரிவித்துள்ளார்.

தொடர்ந்து பேசிய அவர் அதிமுகவை பாஜக தான் திட்டமிட்டு பிரிந்திருப்பதாகவும் பகிரங்க குற்றசாட்டை முன் வைத்துள்ளார். சசிகலாவை விட அவரது முக பாவனைகளே அதிகம் பேசப்பட்டன. இதனை தொடர்ந்து வெண்மதி செங்கோட்டையன் அல்லது டிடிவி தினகரன் உடன் இணைவார் என்று பேசப்படுகிறது. இது சசிகலாவின் அரசியல் பயணத்தை பின்னுக்கு தள்ளும் முதற்படியாக இருக்கிறது என்று கூறி வருகின்றனர்.