தமிழக வெற்றிக் கழகத்தின் பெரியகுளம் தொகுதி எம்.எல்.ஏ சபரி ஐயங்கரன் தனது உறவினர் ஒருவரிடம் ஆவேசமாக வாக்குவாதம் செய்து, காவல்துறையை வைத்து நடவடிக்கை எடுப்பதாக எச்சரித்ததாக கூறப்படும் ஆடியோ ஒன்று சமூக வலைதளங்களில் வேகமாக பரவி வருகிறது. தனிப்பட்ட குடும்ப விவகாரம் தொடர்பாக தொடங்கியதாக கூறப்படும் இந்த வாக்குவாதத்தில், எம்.எல்.ஏ பதவி மற்றும் காவல்துறை அதிகாரிகளை குறிப்பிட்டு பேசப்பட்டிருப்பதாக ஆடியோவில் இடம்பெற்றுள்ளதால் இந்த விவகாரம் அரசியல் சர்ச்சையாகவும் மாறியிருக்கிறது.
தேனி மாவட்டம் பெரியகுளம் சட்டமன்றத் தொகுதியில் தவெக சார்பில் போட்டியிட்டு வெற்றி பெற்றவர் சபரி ஐயங்கரன். தற்போது சமூக வலைதளங்களில் பரவும் ஆடியோவில் பேசுவது சபரி ஐயங்கரன்தான் எனக் கூறப்படுகிறது. இருப்பினும் அந்த ஆடியோவின் உண்மைத்தன்மை சுயாதீனமாக உறுதி செய்யப்படவில்லை. சபரி ஐயங்கரன் தரப்பிலோ தவெக தலைமையிடமிருந்தோ இதுவரை அதிகாரப்பூர்வ விளக்கமும் வெளியாகவில்லை.
சபரி ஐயங்கரனின் உறவினர் ஒருவர் தனது வாட்ஸ்அப் ஸ்டேட்டஸில் குடும்பப் பின்னணி மற்றும் கலப்புத் திருமணம் தொடர்பான பதிவு ஒன்றை வெளியிட்டதாகவும், அதுவே இந்த மோதலுக்கு காரணம் என்றும் கூறப்படுகிறது. அந்தப் பதிவைப் பார்த்ததும் சம்பந்தப்பட்ட உறவினரை சபரி ஐயங்கரன் தொலைபேசியில் தொடர்புகொண்டு கேள்வி எழுப்பியதாக சொல்லப்படுகிறது. தனது குடும்ப விவகாரங்களை சமூக வலைதளத்தில் மறைமுகமாக குறிப்பிட வேண்டிய அவசியம் என்ன என்ற தொனியில் அவர் ஆவேசமாக பேசுவதாக பரவும் ஆடியோவில் கேட்கிறது.
மறுமுனையில் பேசும் நபரோ, சபரி ஐயங்கரனை தனிப்பட்ட முறையில் குறிப்பிடவில்லை என்றும், கலப்புத் திருமணம் மற்றும் திராவிட அரசியல் தொடர்பான பொதுவான கருத்தையே பதிவிட்டதாகவும் விளக்க முயற்சிக்கிறார். ஆனால் அந்த விளக்கத்தை ஏற்காத வகையில் மறுமுனையிலிருந்து தொடர்ந்து கடுமையான வார்த்தைகள் பேசப்படுகின்றன. பெரியகுளம் தொகுதியின் எம்.எல்.ஏ யார் என்பது அனைவருக்கும் தெரியும் என்பதால், குடும்ப விவகாரங்களை வைத்து மறைமுகமாக பதிவிடுவதையும் தன்னை சீண்டுவதையும் ஏற்க முடியாது என்ற ரீதியில் அந்த உரையாடல் நீள்கிறது.
இந்த வாக்குவாதத்தில் அதிக சர்ச்சையை ஏற்படுத்தியிருப்பது காவல்துறை தொடர்பாக பேசப்படும் பகுதிதான். உறவினர் மீதுள்ள குடும்ப மரியாதை காரணமாகவே இதுவரை அமைதியாக இருப்பதாகவும், நிலைமை தொடர்ந்தால் காவல்துறை மூலம் நடவடிக்கை எடுக்க முடியும் என்ற தொனியிலும் அந்தக் குரல் எச்சரிப்பதாக ஆடியோவில் கூறப்படுகிறது. டி.எஸ்.பி., இன்ஸ்பெக்டர் உள்ளிட்ட காவல்துறை அதிகாரிகளை வீட்டிற்கு அனுப்புவது, சிறையில் அமர வைப்பது போன்ற வார்த்தைகளும் இடம்பெற்றிருப்பதாக சமூக வலைதளங்களில் பகிரப்படும் ஆடியோவை முன்வைத்து விமர்சனங்கள் எழுந்துள்ளன.
குறிப்பாக குறிப்பிட்ட நேரத்திற்குள் வாட்ஸ்அப் ஸ்டேட்டஸை நீக்க வேண்டும் என்ற எச்சரிக்கையுடன் உரையாடல் நடைபெறுவதும் சர்ச்சையை அதிகரித்திருக்கிறது. குடும்ப உறவை மனதில் வைத்து பதிவை நீக்குமாறு மறுமுனையில் பேசுபவர் வலியுறுத்த, இறுதியில் சம்பந்தப்பட்ட நபரும் பதிவை நீக்குவதாக கூறுவதுடன் உரையாடல் முடிவடைவதாக அந்த ஆடியோ பரப்பப்படுகிறது.
ஆனால் இது வெறும் இரண்டு உறவினர்களுக்கு இடையே நடந்த தனிப்பட்ட சண்டையாக மட்டும் இருந்திருந்தால் அரசியல் ரீதியாக இவ்வளவு கவனம் பெற்றிருக்க வாய்ப்பில்லை. சட்டமன்ற உறுப்பினராக இருக்கும் ஒருவர் பேசியதாக கூறப்படும் உரையாடலில் காவல்துறை அதிகாரிகளை குறிப்பிட்டு, நடவடிக்கை எடுப்பதாக எச்சரிக்கும் வகையிலான வார்த்தைகள் இடம்பெற்றிருப்பதுதான் விவகாரத்தை வேறு திசைக்கு கொண்டு சென்றிருக்கிறது.
அதிலும் விஜய் தலைமையிலான தவெக ஆட்சிக்கு வந்து சில மாதங்களே ஆகியிருக்கும் நிலையில் இந்த ஆடியோ வெளியாகியிருப்பதும் கவனிக்கப்படுகிறது. திமுக, அதிமுக ஆகிய கட்சிகளுக்கு மாற்றாக புதிய அரசியல் கலாசாரத்தை உருவாக்குவோம் என்ற அடையாளத்துடன் தேர்தல் அரசியலுக்குள் நுழைந்த தவெகவுக்கு, அதன் சட்டமன்ற உறுப்பினர் ஒருவர் அதிகாரத்தை பயன்படுத்தி காவல்துறையை வைத்து உறவினரையே மிரட்டியதாக குற்றச்சாட்டு எழுவது அரசியல் ரீதியாக சங்கடத்தை ஏற்படுத்தக்கூடிய விவகாரமாக மாறியிருக்கிறது.
அதேநேரத்தில் இந்த விவகாரத்தில் ஒரு முக்கியமான விஷயத்தையும் கவனத்தில் கொள்ள வேண்டும். சமூக வலைதளங்களில் பரவும் ஒரு ஆடியோவை மட்டும் அடிப்படையாக வைத்து அதில் பேசுபவர் சபரி ஐயங்கரன்தான் என்றோ, முழுமையான உரையாடல் இதுதான் என்றோ தற்போதைய நிலையில் முடிவுக்கு வர முடியாது. ஆடியோ Edit செய்யப்பட்டதா, முழுமையான உரையாடலில் இருந்து ஒரு பகுதி மட்டும் வெளியிடப்பட்டதா, எந்த சூழலில் இந்த உரையாடல் நடைபெற்றது போன்ற கேள்விகளுக்கும் இன்னும் அதிகாரப்பூர்வமான பதில் கிடைக்கவில்லை.
அதனால் சபரி ஐயங்கரனின் விளக்கம் இந்த விவகாரத்தில் முக்கியமானதாகிறது. ஆடியோவில் இருப்பது தனது குரல் இல்லை என்று அவர் மறுக்கிறாரா, உறவினருடன் உரையாடியது உண்மை ஆனால் வேறு சூழலில் பேசப்பட்ட வார்த்தைகள் தவறாக பரப்பப்படுகின்றன என விளக்கம் அளிக்கிறாரா, அல்லது ஆவேசத்தில் பேசியதாக ஒப்புக்கொள்கிறாரா என்பதை பொறுத்தே இந்த சர்ச்சையின் அடுத்தகட்டம் இருக்கும்.
இதற்கு தவெக தலைமை என்ன Reaction கொடுக்கப்போகிறது என்பதும் அதைவிட முக்கியமானது. ஆடியோவின் உண்மைத்தன்மையை கட்சி தரப்பில் விசாரிக்கப்படுமா, சம்பந்தப்பட்ட எம்.எல்.ஏவிடம் விளக்கம் கேட்கப்படுமா அல்லது இது தனிப்பட்ட குடும்ப விவகாரம் என கடந்து செல்லப்படுமா என்ற எதிர்பார்ப்பும் ஏற்பட்டிருக்கிறது. ஆட்சிக்கு வந்த ஆரம்ப காலகட்டத்தில் தனது எம்.எல்.ஏக்கள் மற்றும் அமைச்சர்கள் தொடர்பான சர்ச்சைகளை விஜய் எப்படி கையாள்கிறார் என்பதே அவரது ஆட்சியின் அரசியல் Image-ஐ தீர்மானிக்கும் காரணிகளில் ஒன்றாக இருக்கும்.
எதிர்க்கட்சிகளும் இந்த விவகாரத்தை கையில் எடுத்தால் சர்ச்சை மேலும் பெரிதாகலாம். குறிப்பாக காவல்துறை சுதந்திரமாக செயல்படுகிறதா என்ற கேள்வியுடன் இதை இணைத்து திமுக, அதிமுக உள்ளிட்ட கட்சிகள் அரசை நோக்கி கேள்விகளை எழுப்ப வாய்ப்பிருக்கிறது. “ஒரு ஆளுங்கட்சி எம்.எல்.ஏ தனது தனிப்பட்ட பிரச்சினைக்கு காவல்துறை அதிகாரிகளின் பெயரை பயன்படுத்தலாமா?” என்ற கேள்வி எழுப்பப்பட்டால், சபரி ஐயங்கரன் மட்டுமல்லாமல் தவெக அரசும் பதிலளிக்க வேண்டிய சூழல் உருவாகலாம்.
தனிப்பட்ட வாட்ஸ்அப் ஸ்டேட்டஸில் தொடங்கியதாக கூறப்படும் குடும்பப் பிரச்சினை, தற்போது ஆளுங்கட்சி எம்.எல்.ஏவை சுற்றிய அரசியல் சர்ச்சையாக மாறியிருக்கிறது. ஆனால் பரவும் ஆடியோ உண்மையானதா என்பதை உறுதி செய்யாமல் அதிலுள்ள குற்றச்சாட்டுகளை உண்மையாக எடுத்துக்கொள்ள முடியாது.
ஆடியோவில் இருப்பது சபரி ஐயங்கரனின் குரல்தானா என்பதற்கு முதலில் அவரிடமிருந்து பதில் வர வேண்டும். ஒருவேளை அது உறுதி செய்யப்பட்டால், அடுத்த கேள்வி இன்னும் முக்கியமானதாக இருக்கும் — உறவினர்களுக்குள் ஏற்பட்ட தனிப்பட்ட பிரச்சினையில் `DSP, Inspector, Jail’ வரை காவல்துறையின் பெயர் வந்தது எப்படி என்பதற்கு விஜய் அரசும் விளக்கம் கொடுக்க வேண்டியிருக்கும்!