News4 TamilOnline Tamil News

மகாராஷ்டிராவில் திடீர் திருப்பம்: முதல்வர், துணை முதல்வர் ராஜினாமாவா?

மகாராஷ்டிராவில் அரசியல் களம் கடந்த ஓரிரு மாதங்களாக டி20 கிரிக்கெட் போட்டி போல ஒவ்வொரு நாளும் விறுவிறுப்பாக இருந்த நிலையில் இன்று சுப்ரீம் கோர்ட் பிறப்பித்த அதிரடி உத்தரவால் பெரும் திருப்பங்கள் ஏற்பட்டுள்ளன

முதல்வர் பட்னாவிஸ் தலைமையிலான அரசு நாளை மாலை 5 மணிக்குள் மெஜாரிட்டியை நிரூபிக்க வேண்டும் என்று சுப்ரீம் கோர்ட்டு உத்தரவிட்டுள்ளது. ஏற்கனவே நேற்று சிவசேனா காங்கிரஸ் மற்றும் தேசியவாத காங்கிரஸ் கட்சியின் 162 எம்எல்ஏக்கள் பத்திரிக்கையாளர்கள் முன்னிலையில் அணிவகுக்கப்பட்ட நிலையில் பாஜக, அஜித் பவார் கூட்டணிக்கு 126 எம்எல்ஏக்கள் மட்டுமே இருப்பது உறுதி செய்யப்பட்டுள்ளது

எனவே நாளைய நம்பிக்கை வாக்கெடுப்பில் முதல்வர் பட்னாவிஸ் அரசு தப்பிக்க வழியே இல்லை என்று கூறப்பட்டு வந்த நிலையில் சற்று முன் துணை முதல்வர் அஜித் பவார் தனது பதவியை ராஜினாமா செய்து விட்டதாக தகவல்கள் வெளிவந்துள்ளது

இதனை அடுத்து முதல்வர் பட்னாவிஸ் அவர்களும் ராஜினாமா செய்துவிட்டதாகவும் இன்னும் சில நிமிடங்களில் அவர் பத்திரிகையாளர்களை சந்திக்க இருப்பதாகவும் செய்திகள் வெளியாகிக் கொண்டிருக்கின்றன

நாளை நம்பிக்கை வாக்கெடுப்பு நடப்பதற்கு முன்னரே முதல்வர் மற்றும் துணை முதல்வர் ராஜினாமா செய்துள்ளதாக வெளி வந்துள்ள தகவல் மகாராஷ்டிர அரசியலில் பெரும் பரபரப்பை ஏற்படுத்தி உள்ளது. இந்த தகவல் உறுதி செய்யப்பட்டால் விரைவில் சிவசேனா தலைமையிலான புதிய அரசு மகாராஷ்டிராவில் பதவி ஏற்கும் என்று எதிர்பார்க்கப்படுகிறது.

மகாராஷ்டிரா அரசுக்கு எதிரான வழக்கு: சுப்ரீம் கோர்ட் அதிரடி உத்தரவு

மகாராஷ்டிரா மாநிலத்தில் சிவசேனா தலைமையிலான அரசு அமைய அனைத்து ஏற்பாடுகளும் நடந்து கொண்டிருந்தபோது திடீரென பாஜக அரசு பொறுப்பேற்றது. அந்த அரசுக்கு தேசியவாத காங்கிரஸ் கட்சியின் ஒரு பிரிவு ஆதரவு அளித்ததால் பெரும் திருப்பம் ஏற்பட்டது

இந்த நிலையில் முதல்வர் பட்னாவிஸ் அரசுக்கு எதிராக சிவசேனா தொடர்ந்த வழக்கில் இன்று சுப்ரீம் கோர்ட் அதிரடி உத்தரவு ஒன்றை பிறப்பித்துள்ளது. இந்த உத்தரவின்படி மகாராஷ்டிர மாநிலத்தில் நாளை நம்பிக்கை வாக்கெடுப்பு நடத்த வேண்டும் என்றும், நம்பிக்கை வாக்கெடுப்பு நடத்துவதற்கு முன்னதாக இடைக்கால சபாநாயகர் ஒருவர் நியமனம் செய்யப்பட வேண்டும் என்றும், அவரது தலைமையில் அனைத்து உறுப்பினர்களும் உறுப்பினராக பதவியை ஏற்றுக்கொள்ள வேண்டும் என்றும் தெரிவித்துள்ளது

இதனையடுத்து இடைக்கால சபாநாயகர் தலைமையில் நம்பிக்கை வாக்கெடுப்பு நடத்தப்பட வேண்டும் என்றும், இந்த நம்பிக்கை வாக்கெடுப்பு மறைமுகமாக நடத்தக்கூடாது என்றும், அதுமட்டுமின்றி நம்பிக்கை வாக்கெடுப்பை தொலைக்காட்சிகளில் நேரடி ஒளிபரப்பு செய்ய வேண்டும் என்றும் சுப்ரீம் கோர்ட்டு அதிரடியாக உத்தரவிட்டுள்ளது

ஏற்கனவே நேற்று சிவசேனா கூட்டணிக்கு 162 எம்எல்ஏக்கள் ஆதரவு இருப்பதை அக்கூட்டணியினர் நிரூபித்த நிலையில் மீதி உள்ள 126 எம்எல்ஏக்களை வைத்து நம்பிக்கை வாக்கெடுப்பில் பாஜக அரசு வெற்றி பெறுமா என்பதை பொறுத்திருந்து பார்ப்போம்

சபரிமலைக்கு வந்த பெண்களை பெப்பர் ஸ்ப்ரே அடித்து விரட்டிய பக்தர்கள்: பெரும் பரபரப்பு

சபரிமலை கோவிலுக்கு சென்று ஐயப்பனை வழிபட கருப்பு உடை மற்றும் மாலை அணிந்து வந்த பெண்கள் சிலரை ஐயப்ப பக்தர்கள் பெப்பர் ஸ்பிரே மற்றும் மிளகாய் பொடி ஸ்பிரே அடித்து விரட்டியது பெரும் பரபரப்பு ஏற்பட்டது

கேரளாவைச் சேர்ந்த ஐந்து பெண்கள் சபரிமலைக்கு செல்வதற்காக கொச்சி காவல்நிலையத்தில் அனுமதி பெற வந்தனர். அவர்கள் அங்கு அனுமதி பெற்ற பின்னர் காவல் நிலையத்தில் இருந்து வெளியே வந்தபோது, அங்கு தயாராக இருந்த ஐயப்ப பக்தர்கள் சிலர் திடீரென அந்தப் பெண்கள் மீது மிளகாய் பொடி மற்றும் பெப்பர் பொடி தூவியதால் பெரும் பரபரப்பு ஏற்பட்டது

இதுகுறித்த வீடியோக்கள் தொலைக்காட்சி மற்றும் சமூக வலைதளங்களில் வைரலாகி வருகிறது. சுப்ரீம் கோர்ட் உத்தரவிட்டும் பெண்கள் சபரிமலைக்கு செல்வதை தடுக்கும் ஒரு சில அமைப்பினர் இவ்வாறு செய்து வருவதாகவும் இதனை அடுத்து காவல்துறையினர் எடுத்த நடவடிக்கையின் பேரில் பெப்பர் ஸ்பிரே அடித்த இரண்டு பேர்களை கைது செய்திருப்பதாகவும் போலீசார் தரப்பிலிருந்து தெரிவித்துள்ளனர்

சபரிமலைக்குச் சென்ற பெண்கள் மீது பெப்பர் ஸ்பிரே அடித்த சம்பவத்திற்கு மகளிர் அமைப்பினர் கடும் கண்டனம் தெரிவித்துள்ளனர். சுப்ரீம் கோர்ட்டு உத்தரவிட்டதால்தான் பெண்கள் சபரிமலைக்கு செல்கின்றனர் என்றும், சபரிமலைக்கு செல்லும் பெண்களுக்கு பாதுகாப்பு அளிக்க வேண்டியது போலீசாரின் கடமை என்றும், போலீஸ் நிலையத்தின் வாசலிலேயே இவ்வாறு ஒரு கொடுமையான சம்பவம் நடந்தது கண்டிக்கத்தக்கது என்றும் மகளிர் அமைப்பினர் கருத்து தெரிவித்து வருகின்றனர்.