News4 TamilOnline Tamil News

சென்னை தேனாம்பேட்டையில் மர்ம நபர்கள் வெடிகுண்டு வீசியதால் பரபரப்பு!

சென்னை அண்ணா மேம்பாலத்தில் இருந்து மர்ம நபர்கள் நாட்டு வெடிகுண்டு வீசி சென்ற சம்பவம் பரபரப்பை ஏற்படுத்தியுள்ளது.

தேனாம்பேட்டை அண்ணா மேம்பாலத்தில் இருசக்கர வாகனத்தில் இருந்து வீசிய வெடிகுண்டு உடனே பலத்த சத்தத்துடன் வெடித்தது. இந்த பாலத்தின் அருகே வியாபார நிறுவனங்களும், பூங்காவும், ஓட்டல்களும் பல்வேறு அலுவலக கட்டிடங்களும் உள்ளன.

ஜெமினி பாலத்தின் கீழ் அல்லது மேல் பகுதியில் எப்போதும் போக்குவரத்து காவல்துறையினர் எப்போதும் இருப்பார்கள். இந்த பாலம் தி.நகரில் இருந்து மவுண்ட் ரோடு வழியாக சென்று மெரினா கடற்கரை, பாரிஸ், சென்னை நீதிமன்றத்திற்கு செல்வதற்கான முக்கியமான வழியாகும். அதுமட்டுமல்லாமல் எப்போதுமே போக்குவரத்து அதிகம் இருக்கும் பாலமாகும்.

இந்நிலையில், இன்று மாலை 4 மணிக்கு மேல் மர்ம நபர்கள் பைக்கில் சென்றபோது வெடிகுண்டை வீசியுள்ளனர். வெடிகுண்டு வெடித்ததில் சம்பவ இடத்தின் அருகே இருந்த காரின் கண்ணாடி உடைந்துள்ளது. இச்சம்பவத்தை அறிந்த காவல்துறையினர் உடனடியாக விரைந்து சம்பவ இடத்தை பார்வையிட்டு சிசிடிவி மூலமாக சோதனை செய்தனர். அதில் இருசக்கர வாகனத்தில் வெடிகுண்டு வீசியது கண்டுபிடிக்கப்பட்டது. இதனையடுத்து மர்ம நபர்களை காவல்துறையினர் தேடி வருகின்றனர்.

திடீரென குண்டுவெடித்த சம்பவம் தேனாம்பேட்டை பகுதி மக்களிடையே பெரும் அச்சத்தை ஏற்படுத்தியுள்ளது.

பெத்த மகனின் கொடுமை தாங்க முடியவில்லை! எங்களை கருணை கொலை செய்துவிடுங்கள்; கண்ணீருடன் புகார்!!

மகனின் கொடுமையை தாங்க முடியாமல், எங்களை கருணை கொலை செய்து விடுங்கள் என்று வயதான பெற்றோர் கலெக்டரிடம் மனுகொடுத்த சம்பவம் அதிர்ச்சியை ஏற்படுத்தியுள்ளது.

திருப்பூர் ராயர்பாளையத்தைச் சேர்ந்த சென்னியப்பன் மற்றும் அவரது மனைவி கருணையம்மாள் என்ற வயதான தம்பதியருக்கு, பழனிச்சாமி என்கிற மகனும், கண்ணம்மாள் என்ற மகளும் உள்ளனர். திருப்பூர் மாவட்ட கலெக்டர் அலுவலகத்தில் வயதான தம்பதி மனு ஒன்றை கொடுத்தனர்.

அந்த மனுவில் கூறப்படுவதாவது; எங்களுடைய மகன் பழனிச்சாமி சொத்துக்களை அபகரித்துக் கொண்டு கடந்த 10 வருடங்களாக தங்களை கொடுமை செய்து வருகின்றனர். ஏற்கனவே மகனும்,மருமகளும் எங்களை அடித்து துன்புறுத்தியதால் பல்லடம் காவல் நிலையத்தில் கொடுத்த வழக்கு நிலுவையில் இருக்கிறது. காவல் நிலையம் மற்றும் மாவட்ட ஆட்சியர் அலுவலகத்தில் தொடர்ந்து மனு கொடுத்தும் எங்களுக்கு நீதி கிடைக்கவில்லை.

எங்களுக்கு வரவேண்டிய மின்சார இணைப்பை துண்டித்துள்ளார், குடிநீரை பிடிக்க விடாமல் பிரச்சினை செய்கிறார். தினமும் நிம்மதி இல்லாமல் தவித்து வருகிறோம். எங்களுக்கான நீதியை வாங்கிக் கொடுங்கள் இல்லையேல் எங்களை கருணை கொலை செய்துவிடுங்கள் என்று மனுவில் கூறப்பட்டுள்ளது. பெற்ற மகன் இவ்வளவு கல் நெஞ்சமாக இருப்பது பலரிடையே பெரும் கோபத்தையும் அதிர்ச்சியையும் ஏற்படுத்தியுள்ளது.