News4 TamilOnline Tamil News

உள்ளாட்சி தேர்தலுக்கான வாக்குப் பதிவு நேரம் இரவு 7 மணி வரை இருப்பதை மாலை 6 மணியாக குறைக்க வேண்டும் என்று தேர்தல் ஆணையம் கூட்டிய ஆலோசனை கூட்டத்தில் அனைத்து கட்சியினரும் வலியுறுத்தினர்.

புதிய மாவட்டங்கள் பிரிப்பு மற்றும் வார்டு வரையறை உள்ளிட்ட காரணங்களால் 9 மாவட்டங்களில் ஊரக உள்ளாட்சி தேர்தல் கடந்த 5 ஆண்டுகளாக நடத்தப்படவில்லை. இங்கு தேர்தல் நடத்த தற்போது மாநில தேர்தல் ஆணையம் ஏற்பாடுகளை செய்து வருகிறது.

இந்த தேர்தல் குறித்து அங்கீகரிக்கப்பட்ட 11 அரசியல் கட்சி பிரதிநிதிகள் பங்கேற்ற ஆலோசனை கூட்டம் சென்னை கோயம்பேட்டில் உள்ள தமிழ்நாடு மாநில தேர்தல் ஆணைய அலுவலகத்தில் நேற்று நடந்தது.

சுமார் ஒரு மணி நேரம் நடந்த கூட்டத்தில் அரசியல் கட்சியினர் பல்வேறு ஆலோசனைகளை கூறி உள்ளனர். குறிப்பாக, 9 மாவட்டங்களிலும் நேர்மையாகவும், நியாயமாகவும், , வெளிப்படை தன்மையுடனும் தேர்தல் நடத்த அரசியல் கட்சிகள் உறுதுணையாக இருக்கும், அதேநேரம் 9 மாவட்டங்களிலும் பதற்றமான வாக்குச்சாவடிகளை கண்டறிந்து அவற்றில் பொதுமக்கள் அச்சமின்றி ஓட்டுப்போட கூடுதல் பாதுகாப்பு வழங்க வேண்டும்.
அதேபோல் ஒரு சில வாக்குச்சாவடிகளில் அசம்பாவிதங்கள் நடக்க வாய்ப்பு இருப்பதால் வாக்குப்பதிவு நேரம் காலை 7 மணியில் இருந்து இரவு 7 மணி வரை என்பது தேவையில்லை. மாறாக காலை 7 மணியில் இருந்து மாலை 6 மணி வரை மட்டும் போதுமானது என்று கூட்டத்தில் ஆலோசனைகள் வழங்கப்பட்டன.

பின்னர் தேர்தல் ஆணையம் வெளியிட்ட அறிவிப்பில், இந்திய தேர்தல் ஆணையத்தால் வெளியிடப்பட்டு நடப்பில் உள்ள சட்டசபை தொகுதிகளுக்கான வாக்காளர் பட்டியல்களில் உள்ள விவரங்களைக் கொண்ட உள்ளாட்சி அமைப்புகளுக்கான வாக்காளர் பட்டியல்கள் தயாரிக்கப்பட்டுள்ளது. அதன் அடிப்படையில் உள்ளாட்சி அமைப்புகளுக்கான தேர்தல்கள் நடத்தப்படும்.

கூட்டத்தில் அரசியல் கட்சி பிரதிநிதிகளால் தெரிவிக்கப்பட்ட கருத்துகள் பரிசீலிக்கப்பட்டு, உச்ச நீதிமன்றத்தின் ஆணையத்தால் தெரிவிக்கப்பட்டவாறு விரைவில் தேர்தல் அறிவிக்கப்படும் என்றும் அதற்கான ஒத்துழைப்பினை அனைத்து அரசியல் கட்சிகளும் வழங்க வேண்டும் என்றும் தெரிவிக்கப்பட்டிருந்தது.

சிக்கிம் மாநிலத்தில் பலத்த மழையினால் ஏற்பட்ட கடுமையான நிலச்சரிவின் காரணமாக அம்மாநிலம் நாட்டிலிருந்து துண்டிக்கப்பட்டுள்ளது.

தேசிய நெடுஞ்சாலை 10 நாட்டின் பிற பகுதிகளுடன் சிக்கிம் மாநிலத்தை இணைகிறது. அந்த மாநில எல்லையான ரங்கோ பூமியில் இருந்து 60 கிலோமீட்டர் தொலைவில் உள்ள நெடுஞ்சாலையில் தொடர்ந்து நிலச்சரிவு ஏற்பட்டு வருகிறது.

இந்தமுறை பெய்த மழை காலங்களில் மட்டும் சுமார் நான்கு முறை நிலச்சரிவு ஏற்பட்டு அப்பகுதியில் போக்குவரத்து தடைபட்டுள்ளது. இந்நிலையில் கடந்த 5 ஆம் தேதி அப்பகுதியில் பெய்த பலத்த மழையின் காரணமாக கடுமையான நிலச்சரிவு ஏற்பட்டது. இதில் சுமார் 60 மீட்டர் நீளத்திற்கு மழை சாலை மற்றும் பாறைகள் சாலைகளின் நடுவே விழுந்து போக்குவரத்து உள்ளது.

இதனால் நாட்டின் பிற பகுதிகளில் இருந்து சிக்கிம் துண்டிக்கப்பட்டுள்ளது அந்த வழியாக செல்ல வேண்டிய வாகனங்கள் மாற்று பாதையில் திருப்பி விடப்பட்டுள்ளன.

மலைப்பிரதேசமான சிக்கிம் மாநிலம் இந்தியாவிலேயே குறைந்த மக்கள் அடர்த்தி கொண்ட இயற்கை எழில்மிகு மாநிலம் என்பதால் அப்பகுதிக்கு மக்கள் ஆர்வமாக சுற்றுலா சென்றுவரும் நிலையில் இதுபோன்ற நிலச்சரிவுகள் உள்ளூர் மக்களின் வாழ்வாதாரத்தை முற்றிலுமாக சீர்குலைத்துள்ளது.

உலகிலேயே முதல் முறையாக 2 வயதிற்குமேல் உள்ள குழந்தைகளுக்கு கொரோனா தடுப்பூசி செலுத்தும் திட்டத்தை கியூபா தொடங்கியுள்ளது.

உலகையே அச்சுறுத்திவரும் கொரோனா வைரஸ் பெருந்தொற்றுக்கு எதிராக உலகம் முழுவதும் தடுப்பூசி போடும் பணி முழு வீச்சில் நடைபெற்று வருகிறது. 18 வயது பூர்த்தியடைந்தவர்களுக்கு தடுப்பூசி போடப்பட்டு வரும் நிலையில், தற்போது பெரும்பாலான நாடுகள் 12- வயதுக்கு மேற்பட்ட சிறுவர்களுக்கும் தடுப்பூசி போடத்தொடங்கியுள்ளன.

இந்த நிலையில், உலகிலேயே முதல் முறையாக 2-வயதுக்கு மேற்பட்ட குழந்தைகளுக்கு தடுப்பூசி போடும் பணி கியூபாவில் தொடங்கியுள்ளது. அப்டாலா மற்றும் சோபிரனா ஆகிய இரு தடுப்பூசிகளும் மருத்துவ பரிசோதனை முடிவடைந்தையடுத்து கடந்த வெள்ளிக்கிழமை முதல் 12-வயதுக்கு மேற்பட்ட சிறார்களுக்கு போடும் பணியை கியூபா தொடங்கியது. இந்த சூழலில், நேற்று முதல் 2-வயதுக்கு மேற்பட்ட குழந்தைகளுக்கும் தடுப்பூசி போடும் பணியை தொடங்கியுள்ளது. கியூபாவின் மத்திய மகாணமான சியன்பியூகோஸ் பகுதியில் குழந்தைகளுக்கு தடுப்பூசி விநியோகிக்கும் பணியை தொடங்கியுள்ளது.

சீனா, ஐக்கிய அரபு அமீரகம், வெனிசூலா ஆகிய நாடுகள் குழந்தைகளுக்கு தடுப்பூசி போட திட்டமிட்டுள்ளதாக அறிவித்திருந்தாலும், கியூபாவில் முதன் முறையாக போடப்பட்டுள்ளது. கியூபாவில் போடப்பட்டுள்ள தடுப்பூசிக்கு இன்னும் உலக சுகாதார அமைப்பு ஒப்புதல் அளிக்கவில்லை என்பது குறிப்பிடத்தக்கது. மருத்துவம் மற்றும் சுகாதாரத்தில் கியூபா பல நாடுகளுக்கு முன்னுதாரனமாக இருந்துவருகிறது. லத்தீன் அமெரிக்க நாடுகளிடையே ஒப்பிடும்போது கொரோனா உயிரிழப்புகள் சதவீதம் கியூபாவில் மிகவும் குறைவாகவே பதிவாகியுள்ளது.