’தலைவி’ ஃபர்ஸ்ட்லுக்கில் டுவிஸ்ட் வைத்த இயக்குனர்!
பிரபல பாலிவுட் நடிகை கங்கனா ரனாவத் ஜெயலலிதா கேரக்டரிலும், பிரபல நடிகர் அரவிந்தசாம் எம்ஜிஆர் கேரக்டரிலும் நடித்து வரும் ‘தலைவி’ என்ற திரைப்படத்தை இயக்குனர் ஏ.எல்.விஜய் இயக்கி வருவது தெரிந்ததே. இந்த படத்தின் படப்பிடிப்பு சமீபத்தில் தொடங்கி தற்போது விறுவிறுப்பாக நடைபெற்று வருகிறது
இந்த நிலையில் இந்த படத்தின் ஃபர்ஸ்ட்லுக்கை இயக்குனர் விஜய் சற்றுமுன் வெளியிட்டுள்ளார். ஜெயலலிதாவின் உருவத்தை போன்று இந்த ஃபர்ஸ்ட்லுக் இருந்தாலும், முகம் ஜெயலலிதாவுக்கு சம்பந்தமே இல்லாமல் இருப்பதாக ரசிகர்கள் மத்தியில் இந்த ஃபர்ஸ்ட்லுக் ஏமாற்றத்தை அளித்துள்ளதாக கூறப்படுகிறது. இருப்பினும் முழு படத்தையும் பார்த்த பின்னரே இந்த படத்தை பற்றிய உண்மையான விமர்சனத்தை சொல்ல முடியும் என்பது குறிப்பிடத்தக்கது
இந்த நிலையில் இந்த படம் 2020ஆம் ஆண்டு ஜூன் 26ஆம் தேதி வெளியாகும் என்று இயக்குனர் விஜய் ஒரு டுவிஸ்ட்டை இந்த ஃபர்ஸ்ட்லுக் போஸ்டரில் வைத்துள்ளார் என்பதும் குறிப்பிடத்தக்கது. ஆனால் இந்த தேதிக்கும் ஜெயலலிதாவுக்கும் சம்பந்தம் இல்லை என்பது குறிப்பிடத்தக்கது.
இந்த படம் தவிர ஜெயலலிதாவின் வாழ்க்கை வரலாறு திரைப்படத்தை பிரியதர்ஷினி என்பவர் ‘தி அயர்ன் லேடி’என்ற பெயரில் இயக்கி வருகிறார். மேலும் இயக்குனர் கவுதம் மேனன் ‘குவீன்’ என்ற பெயரில் வெப் சீரிஸ் ஆக இயக்கி வருகிறார் என்பது குறிப்பிடத்தக்கது
தனியார் மருத்துவக் கல்லூரி கட்டணத்தை மாநில அரசுகளே நிர்ணயிக்க வேண்டும்! மருத்துவர் ராமதாஸ்
தனியார் மருத்துவக் கல்லூரிகளுக்கான கல்விக் கட்டணங்களை மாநில அரசுகளே நிர்ணயிக்க வேண்டும் என்று பாமக நிறுவனர் மருத்துவர் ராமதாஸ் வேண்டுகோள் விடுத்துள்ளார். இது குறித்து இன்று அவர் வெளியிட்டுள்ள தனது அறிக்கையில் கூறியிருப்பதாவது.
இந்தியா முழுவதும் உள்ள தனியார் மருத்துவக் கல்லூரிகளுக்கான கல்விக் கட்டணங்களை இந்திய மருத்துவக் குழுவின் ஆட்சிக்குழு நிர்ணயித்துள்ளது. இது மிகவும் குறைவான கட்டணம் என்று ஊடகங்கள் மூலம் செய்திகள் செய்திகள் பரப்பப்படும் நிலையில், உண்மையில் இந்திய மருத்துவக் குழு பரிந்துரைத்துள்ள கட்டணம் மிகவும் அதிகமாகும். இது ஏழை, நடுத்தர மாணவர்களை சுரண்டுவதற்கே வழி வகுக்கும்.
இந்திய மருத்துவக் குழுவின் ஆட்சிக் குழு அளித்துள்ள பரிந்துரைகளின்படி தனியார் கல்லூரிகளில் உள்ள 50% மருத்துவப்படிப்பு இடங்களுக்கு ஆண்டுக் கட்டணமாக ரூ.8 லட்சம் மட்டுமே வசூலிக்கப்பட வேண்டும் என்று தெரிவிக்கப்பட்டுள்ளது. முதுநிலை மருத்துவப் படிப்பு இடங்களுக்கு ஆண்டுக்கட்டணமாக ரூ.30 லட்சம் வரை வசூலிக்கலாம் என்றும் தெரிவிக்கப்பட்டிருக்கிறது. மீதமுள்ள 50% இடங்களுக்கு கல்லூரி நிர்வாகமே விருப்பம் போல கட்டணம் நிர்ணயித்துக் கொள்ளலாம் என்றும் சலுகை காட்டப்பட்டுள்ளது. இந்தப் பரிந்துரை மருத்துவக் கல்லூரிகளுக்குத் தான் பயனளிக்குமே தவிர மக்களுக்கு பயனளிக்காது.
தமிழ்நாட்டில் கடந்த ஆண்டு வரை தனியார் மருத்துவக் கல்லூரிகளுக்கான கட்டணங்களை மாநில அரசால் அமைக்கப்பட்ட நீதிபதிகள் குழு தான் நிர்ணயித்து வந்தது. தமிழகத்திலுள்ள தனியார் மருத்துவக் கல்லூரிகளில் 65% இடங்கள் அரசு ஒதுக்கீட்டுக்கும், 35% இடங்கள் நிர்வாக ஒதுக்கீட்டுக்கும் வழங்கப் படுகின்றன. அரசு ஒதுக்கீட்டு இடங்களுக்கு அதிகபட்சமாக ரூ.4 லட்சமும், நிர்வாக இடங்களுக்கு ரூ.12 லட்சமும் கட்டணமாக நிர்ணயிக்கப்பட்டுள்ளன. இது ஒப்பீட்டளவில் மிகக் குறைவான கட்டணமாகும்.
ஆனால், 50% இடங்களுக்கு இந்திய மருத்துவக் குழு, தமிழக அரசு நிர்ணயித்த கட்டணத்தை விட இரு மடங்கு கட்டணத்தை நிர்ணயித்திருக்கிறது. அதேபோல், மீதமுள்ள 50% இடங்களுக்கு தனியார் கல்லூரிகளே விருப்பம் போல கட்டணம் நிர்ணயித்துக் கொள்ள அனுமதிக்கப்பட்டிருப்பதால், அத்தகைய இடங்களுக்கு தனியார் நிகர்நிலைப் பல்கலைக்கழகங்களுக்கு இணையாக ஆண்டுக்கு ரூ.25 லட்சம் வரை கட்டணம் நிர்ணயிக்கப்படலாம். இதுவும் தமிழக அரசால் நிர்ணயிக்கப்பட்ட கட்டணத்தை விட இரு மடங்கு அதிகம் ஆகும். இதனால் தமிழகத்தைச் சேர்ந்த மாணவர்கள் தான் அதிகம் பாதிக்கப்படுவர்.
முதுநிலை மருத்துவப் படிப்புக்கு தனியார் பல்கலைக்கழகங்களில் அரசு ஒதுக்கீட்டு இடங்களுக்கு ரூ. 3 லட்சமும், நிர்வாக ஒதுக்கீட்டு இடங்களுக்கு ரூ.11.50 லட்சமும் மட்டுமே கட்டணமாக வசூலிக்கப் படுகிறது. ஆனால், இந்திய மருத்துவக் குழு பரிந்துரைத்திருக்கும் கட்டணம் சராசரியாக ஆண்டுக்கு ரூ.30 லட்சம் ஆகும். இந்திய மருத்துவக் குழுவின் கட்டண பரிந்துரைகள் நடைமுறைப்படுத்தப்பட்டால், தனியார் மருத்துவக் கல்லூரிகளுக்கும், நிகர்நிலைப் பல்கலைக்கழகங்களுக்கும் எந்த வேறுபாடும் இருக்காது. அதன்பின் பணம் படைத்தவர்கள் மட்டும் தான் மருத்துவம் படிக்க முடியும் என்ற நிலை ஏற்பட்டு விடும்.
கட்டண நிர்ணயத்தைப் பொறுத்தவரை கடந்த ஆண்டு வரை மாநில அரசுகளின் கட்டுப்பாட்டில் இருந்த தனியார் மருத்துவக் கல்லூரிகள், இப்போது இந்திய மருத்துவக் குழுவின் கட்டுப்பாட்டிற்குள் கொண்டு செல்லப்பட்டதற்கு காரணம் சில மாதங்களுக்கு முன் நிறைவேற்றப்பட்ட தேசிய மருத்துவ ஆணையச் சட்டம் தான். இந்த சட்டத்தின்படி தான் தனியார் மருத்துவக் கல்லூரிகளுக்கு கட்டணம் நிர்ணயிக்கும் உரிமை மாநில அரசுகளிடமிருந்து இந்திய மருத்துவக் குழுவுக்கு மாற்றப்பட்டிருக்கிறது. ஓர் சீர்திருத்தம் செய்யப்பட்டால், அது மக்களுக்கு நன்மை பயப்பதாக அமைய வேண்டும். ஆனால், மருத்துவக் குழுவுக்கு அதிகாரம் அளிக்கும் இந்த சீர்திருத்தம் மாநில அரசுகளின் உரிமைகளை பறிப்பதுடன் மட்டுமின்றி, ஏழை மற்றும் நடுத்தர மாணவர்களின் மருத்துவக் கல்வி கனவுகளையும் அடியோடு சிதைத்துள்ளது.
தமிழ்நாடு போன்ற மாநிலங்களில் தனியார் மருத்துவக் கல்லூரிகளின் கட்டணம் ஒப்பீட்டளவில் கட்டுப்பாட்டில் தான் உள்ளது. தனியார் நிகர்நிலைப் பல்கலைக்கழகங்கள் தான் மருத்துவப் படிப்புக்காக கோடிக்கணக்கில் கட்டணம் வசூலிக்கின்றன. மருத்துவப் படிப்பு வணிகமயமாக்கப்பட்டிருப்பதற்கு இது தான் முதன்மைக் காரணம். கல்விக்கட்டண சீர்திருத்தங்கள் நிகர்நிலை பல்கலை.களிடமிருந்து தான் தொடங்கப்பட வேண்டும்.
எனவே, தனியார் மருத்துவக் கல்லூரிகளுக்கு கட்டணம் நிர்ணயிக்கும் அதிகாரம் மீண்டும் மாநில அரசுகளிடம் ஒப்படைக்கப்பட வேண்டும். அதேபோல், நிகர்நிலைப் பல்கலைக்கழகங்களில் 65% இடங்கள் அரசு ஒதுக்கீட்டுக்கு வழங்கப்படுவதுடன், அனைத்து இடங்களும் 69% இட ஒதுக்கீட்டைப் பின்பற்றி மாநில அரசின் மூலம் ஒற்றைச்சாளர முறையில் நிரப்பட வேண்டும். அத்துடன், நிகர்நிலைப் பல்கலைக் கழகங்களிலும், மருத்துவக் கல்விக் கட்டணத்தை நிர்ணயிக்கும் அதிகாரம் மாநில அரசுகளுக்கே வழங்கப்பட வேண்டும் என்றும் அவர் குறிப்பிட்டுள்ளார்.
தளபதி விஜய் நடித்து வரும் ’தளபதி 64’ திரைப்படத்தின் படப்பிடிப்பு விறுவிறுப்பாக டெல்லியில் நடைபெற்று வருகிறது. இந்த படத்தில் தளபதி விஜய் கல்லூரி பேராசிரியராக நடித்து வருவதாகவும் ஒரு படம் நீட் தேர்வால் தற்கொலை செய்துகொண்ட அனிதாவின் கதை என்றும் கூறப்படுகிறது
இந்த நிலையில் இந்த படத்தின் டெல்லி படப்பிடிப்பு விரைவில் முடிவடைய உள்ள நிலையில் அடுத்த மாதம் சென்னை திரும்பும் படக்குழுவினர் முதல்கட்டமாக இந்த படத்தின் டைட்டிலுடன் கூடிய ஃபஸ்ட்லுக்கை ரிலீஸ் செய்ய முடிவு செய்திருப்பதாக தகவல்கள் வெளிவந்தது
அனேகமாக ஜனவரி 1ஆம் தேதி இந்த படத்தின் டைட்டில் வெளிவர வாய்ப்பு இருப்பதாகவும், இந்த படத்திற்கு ’டாக்டர்’ அல்லது ’சம்பவம்’ ஆகிய இரண்டு டைட்டில்களில் ஒன்று தேர்வு செய்யப்படலாம் என்றும் கூறப்படுகிறது
எனவே ஜனவரி 1-ஆம் தேதி விஜய் ரசிகர்களுக்கு தரமான ’சம்பவம்’ காத்திருப்பது கிட்டத்தட்ட உறுதியாகியுள்ளது. கமல்ஹாசனின் ’நம்மவர்’ படத்தின் ரீமேக் என்று கூறப்படும் இந்த படத்தின் இந்த படம் விஜய் ரசிகர்கள் மட்டுமின்றி அனைத்து தரப்பினரையும் கவரும் என்று எதிர்பார்க்கப்படுகிறது
லோகேஷ் கனகராஜ் இயக்கத்தில் அனிருத் இசையில் உருவாகி வரும் இந்த படத்தில் விஜய், மாளவிகா மேனன், சாந்தனு, அந்தோணி வர்கீஸ், ஆண்ட்ரியா, பிரிகிதா உள்பட பலர் நடித்து வருகின்றனர். இந்த படம் அடுத்த ஆண்டு ஏப்ரலில் வெளியாகும் என எதிர்பார்க்கப்படுகிறது
சினிமா கூத்தாடிகள் தமிழகத்திற்கு என்ன செய்ய போகிறார்கள்: சுப்பிரமணியன் சுவாமி
சினிமா கூத்தாடிகள் தமிழகத்திற்கு என்ன செய்ய போகிறார்கள்: சுப்பிரமணியன் சுவாமி
கடந்த சில நாட்களாக தமிழகத்தில் ரஜினி, கமலை சுற்றியே அரசியல் நடந்து கொண்டிருக்கும் நிலையில் ரஜினி, கமல் போன்ற சினிமா கூத்தாடிகளால் எந்த பயனும் இல்லை என்று பாஜக மூத்த தலைவர் சுப்பிரமணியன் சுவாமி தெரிவித்துள்ளார்.
இன்று சென்னை விமான நிலையத்தில் செய்தியாளர்களை சந்தித்த சுப்ரமணியன் சுவாமியிடம், ரஜினி அரசியலுக்கு வருவது, ரஜினி – கமல் இணைவது, சசிகலா விடுதலை பற்றி கேள்விகள் கேட்கப்பட்டது. சுப்பிரமணியன் சுவாமி இதுகுறித்து கூறியதாவது:
சினிமா கூத்தாடிகளால் தமிழகத்திற்கு ஒன்றும் செய்ய முடியாது என்றும் நடிகர்கள் அவர்களது திரைப்படம் வெளியாகும் போது மட்டும் விளம்பரத்திற்காக அரசியலுக்கு வருவதாக கூறி இருக்கலாம் என்றும் இதற்கு முன் பலமுறை அரசியலுக்கு வர போவதாக கூறியிருந்தும் ஒருமுறை கூட எதுவும் நடக்கவில்லை என்றும் கூறினார்.
ரஜினியின் அரசியல் குறித்த சினிமா வசனங்களை பலமுறை கேட்டு அலுத்துவிட்டதாகவும், அவர் அரசியலுக்கு வரமாட்டார், வந்தால் பின்னர் பார்த்து கொள்ளலாம் என்றும் கேள்வி ஒன்றுக்கு பதிலளித்தார்.
மேலும் அதிமுக.,வை நல்லமுறையில் நடத்தும் திறமை சசிகலாவுக்கு மட்டுமே உண்டு என்றும் அவர் சிறையில் இருந்து வெளியில் வந்தால் நிச்சயமாக அதிமுக.,வினர் அனைவரும் சசிகலாவிடம் செல்ல வாய்ப்பு இருப்பதாகவும் மற்றொரு கேள்விக்கு பதிலளித்தார்.
ரஜினி, கமலுக்கு முக்கியத்துவம் கொடுத்து தமிழக அரசியல்வாதிகளும் ஊடகங்களும் பேசிக்கொண்டிருக்க, அவர்கள் இருவரையும் ஒரு பொருட்டாகவே மதிக்காமல் சுப்பிரமணியன் சுவாமி கூறிய கருத்துக்கள் பெரும் பரபரப்பை ஏற்படுத்தியுள்ளது
மகாராஷ்டிராவில் திடீர் திருப்பம்: பாஜக அரசு பதவியேற்றது
கடந்த ஒரு மாதமாக மகாராஷ்டிரா மாநிலத்தில் ஆட்சி அமைப்பதில் பெரும் குழப்பங்கள் நடைபெற்று வரும் நிலையில், காங்கிரஸ் மற்றும் தேசியவாத காங்கிரஸ் கட்சியின் ஆதரவில் சிவசேனா கட்சி ஆட்சி அமைக்கும் என்றும், சிவசேனா கட்சியின் உத்தவ் தாக்கரே முதலமைச்சராகவும் அவருடைய மகன் ஆதித்யா தாக்கரே கல்வி அமைச்சராகவும் பொறுப்பு ஏற்பார்கள் என்றும் செய்திகள் வெளியாகின. மகாராஷ்டிர மாநிலத்தில் சிவசேனா தலைமையிலான அரசு இன்று அல்லது நாளை பதவியேற்க வாய்ப்பு இருப்பதாகவும் கூறப்பட்டது.
இந்த நிலையில் திடீர் திருப்பமாக மகாராஷ்டிரா மாநிலத்தில் பாஜகவின் தேவேந்திர பட்நாயக் சற்றுமுன் முதல்வராக பதவியேறார். மகாராஷ்டிராவில் பாஜக ஆட்சி அமைக்க தேசியவாத காங்கிரஸ் கட்சி ஆதரவு தர ஒப்புக்கொண்டதை அடுத்து பாஜக ஆட்சி பதவியேற்றுள்ளது என்பது குறிப்பிடத்தக்கது. தேவேந்திர பட்னவிஸ் அவர்களுக்கு முதல்வராகவும், அஜித் பவார் துணை முதல்வராகவும் பதவியேற்க அவர்களுக்கு ஆளுநர் பகத் சிங் கோஷ்யாரி பதவிப்பிரமாணம் செய்து வைத்தார். பதவியேற்ற இருவருக்கும் பிரதமர் மோடி வாழ்த்து தெரிவித்தார்.
காங்கிரஸ் கூட்டணியில் போட்டியிட்டு சிவசேனாவுக்கு ஆதரவு அளிக்க நேற்று வரை பேச்சுவார்த்தை நடத்தி வந்த தேசியவாத காங்கிரஸ், திடீரென பாஜகவிற்கு ஆதரவு அளித்திருப்பது அம்மாநிலத்தில் பெரும் பரபரப்பை ஏற்படுத்தி உள்ளது
தேசியவாத காங்கிரஸ் தலைவர் சரத்பவாருக்கு ஜனாதிபதி பதவியை தர பாஜக ஒப்புக் கொண்டுள்ளதாகவும் இதனையடுத்தே பாஜக ஆட்சி அமைக்க தேசியவாத காங்கிரஸ் ஆதரவு வழங்க முன்வந்துள்ளதாகவும் கூறப்படுகிறது. மொத்தத்தில் மகாராஷ்டிராவில் ஏற்பட்ட இந்த திடீர் அரசியல் திருப்பம் அம்மாநிலத்தில் பரபரப்பு ஏற்பட்டுள்ளது.
தமிழகத்தில் விற்கப்படும் பாலில் தான் இந்தியாவிலே அதிக நச்சுத்தன்மை உள்ளதாக மத்திய சுகாதாரம் மற்றும் குடும்ப நலத்துறை அமைச்சர் அஸ்வினி குமார் சவுபே நாடாளுமன்றத்தில் தெரிவித்துள்ளார்.
மக்களவையில் இன்று கேள்வி நேரத்தின் போது திமுகவின் டி ஆர் பாலு எழுப்பிய கேள்விக்கு பதிலளித்த அஸ்வினி குமார் சாவுபே, “2018 ஆம் ஆண்டு நடத்த பெற்ற ஆய்வில் 6 ஆயிரத்து 432 மாதிரிகள் சோதனைக்கு உள்ளாக்க பட்டன. அவற்றில் 368 மாதிரிகளில் அடலாடாக்ஸின் (aflotoxin) எம் -1 அனுமதிக்கப்பட்ட அளவை விட அதிகம் இருப்பது தெரிய வந்துள்ளது. இந்த வகையான நச்சுத்தன்மை உள்ள பால்கள் தமிழகத்தில் தான் அதிகம் விற்கப்படுகின்றன” என்றார்.
நாட்டில் உற்பத்தி செய்யப்படும் பாலில் 93 சதவீதம் மனிதர்கள் அருந்த சரியானது என்றும் அவர் கூறினார்.
அப்லோடாக்ஸின்(aflotoxin) என்னும் வேதிப்பொருள் தொடர்ந்து உட்கொண்டு வந்தால் புற்று நோய் ஏற்பட வாய்ப்புள்ளதாக மருத்துவ ஆராய்ச்சிகள் தெரிவிக்கின்றன.
கேப்டனாக விராத் கோஹ்லி செய்த சாதனை: குவியும் பாராட்டுக்கள்
இந்திய கிரிக்கெட் அணியின் கேப்டனாக விராத் கோஹ்லி கடந்த 2014ஆம் ஆண்டு பொறுப்பேற்ற நிலையில் இந்த ஐந்து ஆண்டுகளில் கேப்டனாக மட்டும் 5000 ரன்கள் அடித்த முதல் இந்திய வீரர் என்ற சாதனையை பெற்றுள்ளார். மேலும் சர்வதேச அளவில் 5000 ரன்களுக்கும் மேல் எடுத்த கேப்டன்களில் 6வது இடத்தில் விராத் கோஹ்லி உள்ளார்
கடந்த 2014 ஆம் ஆண்டு முதல் இன்று வரை கேப்டனாக மட்டும் 53 டெஸ்ட் போட்டிகளில் 86 இன்னிங்ஸ் விளையாடிய விராத் கோஹ்லி, 5027 ரன்கள் எடுத்துள்ளார். இதில் 19 சதங்கள், 13 அரைசதங்கள் என்பது குறிப்பிடத்தக்கது
இதற்கு முன்னர் 5000 ரன்கள் கடந்த வீரர்களின் பட்டியல்
தென்னாப்பிரிக்காவின் ஸ்மித்: 8659 ரன்கள்
ஆஸ்திரேலியாவின் ஆலன் பார்டர்: 6623 ரன்கள்
ஆஸ்திரேலியாவின் பாய்ண்டிங்: 6542 ரன்கள்
மேற்கிந்திய தீவுகளின் லாயிடு: 5233
நியூசிலாந்தின் பிளம்மிங்: 5156
புதிய சாதனை செய்த இந்திய வீரர் விராத் கோஹ்லிக்கு வாழ்த்துக்கள் குவிந்து வருகிறது. மேலும் மேற்கண்ட ஐந்து வீரர்களும் தற்போது ஓய்வு பெற்றுவிட்டதால் இன்னும் 1000 ரன்கள் எடுத்தாலே விராத் கோஹ்லி இரண்டாவது இடத்தை பிடித்துவிடுவார் என்பது குறிப்பிடத்தக்கது
மக்களிடம் கொள்ளை கட்டணம் வசூல் செய்த டெலிகாம் நிறுவனங்கள் மத்திய அரசை ஏமாற்றிய அதிர்ச்சி தகவல்
இந்தியாவில் பயன்பாட்டில் உள்ள தகவல் தொடர்பு சேவையை வழங்கும் தொடர்பு நிறுவனங்கள் அரசுக்கு வழங்க வேண்டிய உரிமக் கட்டணங்கள் மற்றும் அலைக்கற்றைப் பயன்பாட்டு கட்டணங்களை செலுத்தாமல் இழுத்தடித்து வருகின்றன என்ற அதிர்ச்சி தகவல் வெளியாகியுள்ளது. இந்நிலையில் இதுவரை இந்த நிறுவனங்கள் செலுத்தாமல் இழுத்தடித்து வந்த தொகையை உடனடியாக செலுத்துமாறு பிறப்பித்த உத்தரவை மறுபரிசீலனை செய்யக்கோரி உச்ச நீதிமன்றத்தில் வோடபோன் ஐடியா, ஏர்டெல், டாடா டெலிசர்வீசஸ் உள்ளிட்ட தொலை தொடர்பு நிறுவனங்கள் மனுத்தாக்கல் செய்துள்ளன.
தகவல் தொடர்பு சேவையில் புரட்சியை ஏற்படுத்திய ரிலையன்ஸ் நிறுவனத்தின் ஜியோ சேவை அறிமுகமான பின்னர் இந்திய தகவல் தொலைத் தொடர்பு துறையில் கடுமையான போட்டி உருவானது. இதனால் ரிலையன்ஸ் நிறுவனத்தின் ஜியோ சேவைக்கான கட்டணங்களை போல மற்ற நிறுவனங்களும் தொடர்ந்து சேவைக் கட்டணங்களைக் குறைக்க வேண்டிய கட்டாய நிலைக்கு தள்ளபட்டன.
இதனால் ஏற்கனவே சேவையை வழங்கி வந்த வோடபோன், ஐடியா, ஏர்டெல் போன்ற நிறுவனங்கள் கடும் நிதி நெருக்கடியைச் சந்தித்துள்ளன என்று கூறப்படுகிறது. இதனால் இந்த தொலைத் தொடர்பு நிறுவனங்கள் மத்திய அரசுக்கு செலுத்த வேண்டிய உரிமக் கட்டணங்கள் மற்றும் அலைக்கற்றைப் பயன்பாட்டுக்கான நிலுவைத் தொகைகளை செலுத்தாமல் பாக்கி வைத்துள்ளன.
இந்நிலையில் இந்த தொகையானது தற்போது பெரிய அளவில் வளர்ந்துள்ள நிலையில் இதுதொடர்பான வழக்கில் தொலைத் தொடர்பு நிறுவனங்கள் நிலுவையில் வைத்துள்ளதாக கூறப்படும் அலைக்கற்றை உரிமக் கட்டணங்கள் மற்றும் அலைக்கற்றைப் பயன்பாட்டுத் தொகைகளை உடனடியாகச் செலுத்துமாறு உச்ச நீதிமன்றம் அந்த நிறுவனங்களுக்கு உத்தரவிட்டுள்ளது.
இதை சற்றும் எதிர்பார்க்காத வோடபோன், ஏர்டெல் உள்ளிட்ட நிறுவனங்கள் பெரும் சிக்கலில் சிக்கிக் கொண்டன என்றும் கூறப்படுகிறது. இதற்கு காரணமாக கடந்த காலாண்டில் அந்த நிறுவனங்களின் நிதிநிலை மிக மோசமான அளவை எட்டியது என்று கூறப்படுகிறது.
இந்த இக்கட்டான சூழ்நிலையில் தங்களால் வர்த்தகத்தைத் தொடர முடியாது என்றும், மேலும் அரசு நிவாரணம் அளிக்க வேண்டும் என்றும் கோரிக்கை வைத்தன. ஆனால் இந்த தொகை செலுத்தக் கூடிய அளவில் இருந்தும் அதனை நிறுவனங்கள் செலுத்தவில்லை என்று அரசு தரப்பு கூறுகிறது.
கடந்த 2018-19– நிதியாண்டில் வோடபோன் மற்றும் ஐடியா நிறுவனங்களின் மொத்த வருவாய் ரூ.37,000 கோடி. இதில் அரசு கேட்கும் தொகைக்காக தனியாக ரூ.18,470 கோடியையும் இந்த நிறுவனம் ஒதுக்கியிருந்துள்ளது. எனவே அரசுக்குச் சேர வேண்டிய தொகையை செலுத்தக் கூடிய நிலையில் இருந்தும் அதை செலுத்தாமல் இழுத்தடித்து வருகிறது.
இதை போலவே பார்தி ஏர்டெல் நிறுவனம் அரசுக்கு செலுத்த வேண்டிய தொகை ரூ.6,164 கோடி, ஆனால் அதை முறையாக சரியான நேரத்தில் செலுத்தாததினால் வந்த வட்டி, அபாரதம், அபராத வட்டி என்று ரூ.22, 286 கோடியாக அதிகரித்துள்ளது. இந்நிலையில் அந்த நிறுவனம் செலுத்த வேண்டிய இறுதித் தொகை தற்போது ரூ.28,450 கோடியாக உள்ளது. ஆனால் பார்தி ஏர்டெல்லின் கடந்த 2018-19 ஆம் ஆண்டிற்கான மொத்த ஆண்டு வருவாய் சுமார் ரூ.50,000 கோடியாக இருந்தும் இந்த நிறுவனமும் இழுத்தடித்து வருகிறது. இந்த நிறுவனங்களை போல ஜியோ நிறுவனம் செலுத்த வேண்டிய தொகை 6,670 கோடி ரூபாயாகும். மொத்த தொகை சுமார் 45 ஆயிரம் கோடி ரூபாயாகும்.
இந்த நிலையில் இந்த நிறுவனங்கள் எதிர்பார்த்தது போலவே இந்த தொகையை செலுத்த மத்திய அரசு அந்த நிறுவனங்களுக்கு மேலும் 2 ஆண்டுகள் கால அவகாசம் வழங்கியுள்ளது. இதன் மூலம் நிதி நெருக்கடிக்கு ஆளாகியுள்ள வோடபோன், ஏர்டெல் நிறுவனங்கள் நிம்மதியடைந்துள்ளன.
இந்நிலையில் தொலைத் தொடர்பு நிறுவனங்கள் செலுத்த வேண்டிய உரிமக் கட்டணங்கள் மற்றும் அலைக்கற்றைப் பயன்பாட்டுத் தொகைகளை செலுத்துமாறு பிறப்பித்த உத்தரவை மறுபரிசீலனை செய்யக்கோரி உச்ச நீதிமன்றத்தில் வோடபோன் ஐடியா, ஏர்டெல், டாடா டெலிசர்வீசஸ் ஆகிய நிறுவனங்கள் மனுத்தாக்கல் செய்துள்ளன என்றும் தகவல்கள் தெரிவிக்கின்றன.
மக்களிடம் கொள்ளை கட்டணம் வசூல் செய்த டெலிகாம் நிறுவனங்கள் இவ்வாறு மத்திய அரசுக்கு செலுத்த வேண்டிய தொகையை செலுத்தாமல் இழுத்தடித்து வருவது மக்கள் மத்தியில் அதிர்ச்சியை ஏற்படுத்தியுள்ளது.
முதல் பகலிரவு டெஸ்ட்டில் இந்தியா அசத்தல்: 106 ரன்களில் சுருண்ட வங்கதேசம்
இந்தியா மற்றும் வங்கதேச அணிகள் விளையாடும் முதல் பகலிரவு டெஸ்ட் போட்டி இன்று கொல்கத்தாவில் தொடங்கியது. இந்த போட்டியில் டாஸ் வென்ற வங்கதேசம் முதலில் பேட்டிங் செய்ய முடிவெடுத்து களமிறங்கியது. ஆனால் இந்திய பந்துவீச்சாளர்களின் அதிரடி பந்துவீச்சால் அந்த அணி 106 ரன்களில் ஆட்டமிழந்தது
தொடக்க ஆட்டக்காரர் இஸ்லாம் ஓரளவு நிலைத்து நின்று ஆடி 29 ரன்களை எடுத்திருந்தபோதிலும் அதன்பின் களமிறங்கிய ஐந்து பேட்ஸ்களும் ஒற்றை இலக்க ரன்களில் அவுட் ஆகினர் என்பதும் இவர்களில் மூவர் டக் அவுட் என்பதும் குறிப்பிடத்தக்கது.
இறுதியில் லிட்டன் தாஸ் மற்றும் நயீம் ஹசன் ஓரளவு நிலைத்து ஆடி தலா 24 மற்றும் 19 ரன்களை எடுத்ததால் வங்கதேச அணியின் ஸ்கோர் 100ஐ தாண்டியது. இஷாந்த் ஷர்மா அபாரமாக பந்துவீசி 5 விக்கெட்டுக்களை வீழ்த்தினார். உமேஷ் யாதவ் 3 விக்கெட்டுக்களையும் ஷமி 2 விக்கெட்டுக்களையும் வீழ்த்தினர்.
இந்த நிலையில் முதல் இன்னிங்ஸை விளையாடி வரும் இந்திய அணி சற்றுமுன் வரை 12 ஓவர்களில் ஒரு விக்கெட்டை இழந்து 33 ரன்கள் எடுத்துள்ளது. மயாங்க் அகர்வால் 14 ரன்களில் அவுட் ஆனார். தற்போது ரோஹித் சர்மா மற்றும் புஜாரே பேட்டிங் செய்து வருகின்றனர்.
திமுகவை கடுமையாக விமர்சித்த விசிக! விரைவில் கூட்டணியிலிருந்து வெளியேற்றம்?
காங்கிரஸ் தலைவர் சோனியா காந்தி குடும்பத்திற்கு அளிக்கப்பட்ட கருப்பு பூனைபடை பாதுகாப்பை சில நாட்களுக்கு முன்னர் மத்திய அரசு திரும்ப பெற்றது. இதற்கு காங்கிரஸ் மற்றும் அதன் கூட்டணி கட்சிகள் கடும் கண்டனங்களை தெரிவித்தன.
இதுதொடர்பாக நாடாளுமன்றத்தில் தி.மு.க. நாடாளுமன்ற உறுப்பினர் டி.ஆர்.பாலு பேசும்போது, விடுதலை புலிகளால் சோனியாவின் உயிருக்கு ஆபத்து இருப்பதாக சுட்டிக் காட்டினார். இந்த சூழ்நிலையில் பாதுகாப்பை விலக்கி கொள்வது கண்டனத்திற்குரியது என்றும் தெரிவித்தார். இது தமிழ் ஆதரவாளர்களிடையே மிகுந்த அதிர்ச்சியை ஏற்படுத்தியது. ஈழத்தமிழர்களுக்கு ஆதரவாக இருப்பதாக காட்டிக்கொள்ளும் திமுக, விடுதலை புலிகளை சுட்டிக்காட்டி பேசியது கடும் அதிர்வலைகளை தமிழகத்தில் ஏற்படுத்தியுள்ளது.
இதற்கு நாம் தமிழர் கட்சி தலைவர் சீமான் கடும் கண்டனத்தை தெரிவித்தார், இதனை தொடர்ந்து விடுதலை சிறுத்தைகள் கட்சி, மதிமுக போன்ற கட்சிகளின் நிலைப்பாடு என்ன என்பதை தெரிவிக்காமல் இருந்தன.
இந்த சூழ்நிலையில் விடுதலை சிறுத்தைகள் கட்சி செய்தி தொடர்பாளர் வன்னியரசு திமுகவையும் காங்கிரஸையும் கடுமையாக விமர்சித்து டிவிட்டரில் பதிவிட்டுள்ளார்.
விடுதலைப்புலிகள் தேசத்தின் காவலர்கள்.சிங்கள பவுத்த பயங்கரவாதத்துக்கு எதிராக தம் மக்களை காப்பாற்றிய மக்கள் இயக்கமே விடுதலைப்புலிகள். அப்படிப்பட்ட புலிகளை அழித்து விட்டதாக அறிவித்த பிறகும், விடுதலைப்புலிகளை வைத்து பாதுகாப்பு கேட்பது நாகரீகமா? என்று திமுகவிற்கு கேள்வி எழுப்பி உள்ளார்.
விடுதலைப்புலிகள் தேசத்தின் காவலர்கள்.சிங்கள பவுத்த பயங்கரவாதத்துக்கு எதிராக தம் மக்களை காப்பாற்றிய மக்கள் இயக்கமே விடுதலைப்புலிகள். அப்படிப்பட்ட புலிகளை அழித்து விட்டதாக அறிவித்த பிறகும், விடுதலைப்புலிகளை வைத்து பாதுகாப்பு கேட்பது நாகரீகமா? @RahulGandhi@INCIndia@arivalayampic.twitter.com/Pd9s4oVR5z
ஏற்கனவே முதலமைச்சர் எடப்பாடி பழனிச்சாமியை சந்தித்து திருமாவளவன் திமுகவிற்கு எரிச்சல் ஊட்டினார், வன்னியரசுவின் இந்த டிவிட்டர் பதிவு கூட்டணியில் சலசலப்பை ஏற்படுத்தும் என்று தெளிவாக தெரிகிறது.
